სამთავრობო პროგრამის,,აწარმოე საქართველოში" ფარგლებში, ბიზნესმენი თემურ გიგაშვილი გორში თევზისა და ფრინველის საკვების მწარმოებელ და მეხორცული მიმართულების მქონე მეფრინველეობის საწარმოს ააშენებს.
პროგრამის ფარგლებში და პროექტის განსახორციელებლად მთავრობამ თემურ გიგაშვილს გორის მუნიციპალიტეტში, სოფელ ბერბუკში მდებარე 5000 კვ.მ არასასოფლო-სამეურნეო დანიშნულების მიწის ნაკვეთი და მასზე განთავსებული შენობა-ნაგებობები პირდაპირი მიყიდვის ფორმით, 1 ლარად გადასცა.
მთავრობის №1237განკარგულებიდან ირკვევა, რომ თემურ გიგაშვილი ვალდებულია გადაცემულ უძრავ ქონებაზე, 2 წლის განმავლობაში, თევზისა და ფრინველის საკვების მწარმოებელი და მეხორცული მიმართულების მქონე მეფრინველეობის (ფრინველის ხორცის მწარმოებელი) საწარმო შექმნას და წარმოებაც დაიწყოს.
ასევე, საპრივატიზებო პირობების შესრულების მიზნით, არანაკლებ 144 000 ლარის ინვესტიციის განხორციელება შემდეგი გრაფიკის მიხედვით: ინვესტიციის 25%-ი 1 წლის განმავლობაში განხორციელდება, ხოლო დარჩენილი 75 %-ი კი მერე წელს. უკვე ცნობილია, რომ საწარმო კომპლექსი წელიწადში 900 ტონა თევზისა და ფრინველის საკვებსა და ფრინველის ხორცს უზრუნველყოფს. წინასწარ გაწერილი გრაფიკის მიხედვით, საწარმომ წარმოების დაწყებიდან პირველ წელს, წარმოების შემოთავაზებული წლიური მოცულობის არანაკლებ 25%-ი უნდა აწარმოოს, ხოლო მეორე წელს კი 50 %-ი.
