„ჩემი შვილი იმიტომ მოკლეს, რომ „ქართული ოცნება" სკამებისთვის იბრძოდა. წელიწადნახევარზე მეტი გავიდა და საქმე გამოუძიებელია", - განუცხადა კახეთის საინფორმაციო ცენტრს ბარბარე რაფალიანცის მამამ პავლე რაფალიანცმა. 2012 წლის საპარლამენტო არჩევნების წინა ღამით მოკლული 10 თვის ბარბარე რაფალიანცის ოჯახის წევრებმა შს მინისტრთან ალექსანდრე ჭიკაიძესთან შეხვედრის მოთხოვნით შსს-თან აქცია გამართეს, თუმცა მინისტრი მათ არ შეხვდა.
როგორც კახეთის საინფორმაციო ცენტრს ბავშვის ბებიამ თინა მექერიშვილმა განუცხადა, საქმის გამოძიებას საჯაროდ მხოლოდ „ნაციონალური მოძრაობა" ითხოვს. „მარტო გიორგი ღვინიაშვილი აკეთებს ხოლმე განცხადებებს და საქმის გამოძიებას ითხოვს. მას აბრალებდა მანანა ბერიკაშვილი ბავშვის მკვლელობას. „ქართული ოცნებიდან" არავის ვახსოვართ. დასხდნენ თანამდებობებზე და ეს საქმე აღარ ახსოვთ. გამომძიებლები პასუხსაც აღარ გვცემენ. საპრეზიდენტო და თვითმმართველობის არჩევნებამდე, წინასაარჩევნოდაც გვინდოდა ამ საქმეზე გამოძიების გაჭიანურებასთან დაკავშირებით განცხადების გაკეთება, მაგრამ საშუალებას არ გვაძლევდნენ. სახლში მოდიოდნენ და გვაშინებდნენ. ეს წელიწადნახევარი იცით როგორ შიშში ვცხოვრობთ? ბავშვებს მარტო ვერ ვტოვებთ. თავი ბალიშზე აღარ გვიდევს", - აღნიშნა თინა მექერიშვილმა.
მისივე თქმით, შს სამინისტროთან მათ ჯერ უთხრეს, რომ მინისტრი თბილისში არ იმყოფებოდა, შემდეგ კი უთხრეს, რომ საქართველოში არ იყო და შეხვედრა ვერ შედგებოდა.
შს სამინისტროს შემდეგ ბარბარე რაფალიანცის ოჯახის წევრებმა კულტურის სამინისტროსთან გადაინაცვლეს, სადაც მანანა ბერიკაშვილთან შეხვედრა მოითხოვეს. მანანა ბერიკაშვილი ბარბარე რაფალიანცის მკვლელობის დროს „ქართული ოცნებიდან" გურჯაანის მაჟორიტარი დეპუტატობის კანდიდატი იყო და ბავშვის მკვლელობას „ნაციონალურ მოძრაობას" და მის კონკურენტს გიორგი ღვინიაშვილს აბრალებდა. არჩევნებამდე რამდენიმე საათით ადრე, კოალიცია „ქართული ოცნების" ლიდერის ბიძინა ივანიშვილის ოჯახის საკუთრებაში არსებული ტელეკომპანია „მეცხრე არხი" ამ ბრალდებებს და შემზარავ კადრებს შემთხვევის ადგილიდან პირდაპირ ეთერში გადასცემდა.
ბარბარე რაფალიანცის ოჯახის წევრები აქციის გამართვას მთავრობის ადმინისტრაციასთანაც აპირებენ პრემიერთან, ირაკლი ღარიბაშვილთან შეხვედრის მოთხოვნით. „ვიდრე შს მინისტრი იყო, ხომ ამბობდა, საქმე პირად კონტროლზე ავიყვანეო, რა გააკეთა აბა? რით ვერ გამოიძიეს? მაგათ გამოძიება რომ უნდოდეთ, აქამდე გამოიძიებდნენ. ვაპირებთ, რომ შსს-თან შიმშილობა დავიწყოთ საქმის გამოძიების მოთხოვნით", - განაცხადა თინა მექერიშვილმა.
10 თვის ბარბარე რაფალიანცი 2012 წლის 30 სექტემბერს, გურჯაანის რაიონის სოფელ კოლაგში, დაახლოებით ნახევარსაათიანი ძებნის შემდეგ, საძინებელი ოთახის გვერდით მდებარე მარანში, წყლით სავსე ქვევრში გარდაცვლილი იპოვეს. ქვევრს ზემოდან ქვა ჰქონდა დაფარებული. ექსპერტიზის დასკვნის თანახმად, 10 თვის გოგონა ქვევრში ცოცხალი ჩააგდეს და მისი სიკვდილის მიზეზი გახდა ასფიქსია სასუნთქ გზებში სითხის მოხვედრით.
მასალის გამოყენების პირობები