აშშ-ში საქართველოს ელჩის არჩილ გეგეშიძის განცხადებით, ყოფილი პრეზიდენტის მიხეილ სააკაშვილის თემა აშშ-ში ინტერესს იწვევს. როგორც ელჩმა ჟურნალისტებთან განაცხადა ინტერესი ბუნებრივია, რადგან ჩვენი ქვეყანა ახალგაზრდა დემოკრატიაა, სადაც საინტერესო პროცესები ვითარდება.
,,სააკაშვილის თემა ინტერესს იწვევს ამერიკის შეერთებულ შტატებში. ვერ ვიტყვი, რომ საყოველთაო ინტერესის საგანია, მაგრამ არიან ცალკეული წრეები, ცალკეული ჯგუფები, იქნებიან ეს სენატორები, ადმინისტრაციული სტრუქტურების წარმომადგენლები, თუ მედია საშუალებები. კითხვები და ინტერესი ბუნებრივია. საქართველო ახალგაზრდა დემოკრატია გახლავთ, ქვეყანაში საინტერესო პროცესები ვითარდება, განსაკუთრებით ბოლო ხანებში. შეიცვალა ხელისუფლება, ჩატარდა რამდენიმე წარმატებული არჩევნები. ყველა გვგულშემატკივრობს, რომ გზა, რომელსაც საქართველო ადგას, ქვეყანამ წარმატებით გაიაროს", _განაცხადა გეგეშიძემ.