რამდენიმე დღეში გახდება ცნობილი, მიიღებს თუ არა სააპელაციო სასამართლო წარმოებაში ყოფილი პრეზიდენტის მიხეილ სააკაშვილისა და ყოფილი მაღალჩინოსნების ადვოკატების სარჩელს.
ყოფილი პრეზიდენტის მიხეილ სააკაშვილისა და ყოფილი მაღალჩინოსნების ზურაბ ადეიშვილისა და დავით კეზერაშვილის ადვოკატებმა თბილისის საქალაქო სასამართლოს გადაწყვეტილება სააპელაციოაში გაასაჩივრეს.
შეგახსენებთ, რომ თბილისის საქალაქო სასამართლომ საქართველოს ყოფილ პრეზიდენტს, მიხეილ სააკაშვილს, იუსტიციის ყოფილ მინისტრს, ზურაბ ადეიშვილსა და თავდაცვის ყოფილი მინისტრს, დავით კეზერაშვილს აღკვეთის ღონისძიების სახით წინასწარი პატიმრობა შეუფარდა. საქმე მოსამართლე სპარტაკ პავლიაშვილმა განიხილა.
მისი თქმით, სამივე პირის საქმეშია მტკიცებულებები და არ არსებობს აღკვეთის ღონისძიებაზე უარის თქმის საფუძველი.
მიხეილ სააკაშვილი ბრალდებულის სახით სისხლის სამართლის პასუხისგებაში 28 ივლისს მიეცა. მთავარი პროკურატურის განცხადებით, "საქმე ეხება 2007 წლის 7 ნოემბერს მომიტინგეთა მასობრივ დარბევას, ტელეკომპანია იმედში შეჭრას და არკადი პატარკაციშვილის კუთვნილი ქონების დანაშაულებრივად ხელში ჩაგდებას". პროკურატურა ყოფილი პრეზიდენტისთვის აღკვეთის ღონისძიებად წინასწარ პატიმრობას მოითხოვს. მიხეილ სააკაშვილთან ერთად, ბრალი წაუყენეს შინაგან საქმეთა ყოფილ მინისტრს ივანე მერაბიშვილს, ყოფილ გენერალურ პროკურორს ზურაბ ადეიშვილს, თავდაცვის ყოფილ მინისტრს დავით კეზერაშვილს და თბილისის ყოფილ მერს გიორგი უგულავას. მათ წინააღმდეგ გამოძიება სისხლის სამართლის კოდექსის 333-ე მუხლის მესამე ნაწილით, სამსახურებრივი უფლებამოსილების გადამეტების ბრალდებით მიმდინარეობს, რაც სასჯელის სახედ და ზომად ითვალისწინებს თავისუფლების აღკვეთას 5-დან 8 წლამდე ვადით.
ამ ეტაპზე პროკურატურას 7 ნოემბრის აქციის დარბევისა და "ტელეიმედში" შეჭრის საქმეზე უგულავასა და მერაბიშვილის მიმართ აღმკვეთი ღონისძიების შეფარდების შუამდგომლობით სასამართლოსთვის არ მიუმართავს.
