საგარეო საქმეთა მინისტრის მოადგილე დავით ზალკალიანი რუსეთის ფედერაციის გადაწყვეტილებას საქართველოსთან თავისუფალი ვაჭრობის რეჟიმის შეჩერების შესახებ ეხმიანება და აცხადებს, რომ საგარეო უწყებას აღნიშნულთან დაკავშირებით ოფიციალური კორესპონდენცია არ მიუღია.
,, ჩვენ, სამწუხაროდ, მხოლოდ პრესიდან შევიტყვეთ რუსეთის ის შესაძლო გადაწყვეტილება, რომელიც დაკავშირებულია ორმხრივი თავისუფალი ვაჭრობის ხელშეკრულების შეჩერებასთან. დღემდე არანაირი ოფიციალური კორესპონდენცია არ მიგვიღია. მაგრამ თუ ეს გადაწყვეტილება მიღებული იქნება რუსეთის ფედერაციის მხრიდან მინდა აღვნიშნო, რომ ეს არავითარ შემთხვევაში არ ნიშნავს საქართველოში წარმოებული ექსპორტის შეზღუდვას რუსეთის ფედერაციაში. ამას შეიძლება შედეგად მოჰყვეს მხოლოდ და მხოლოდ ის, რომ გაიზარდოს საბაჟო ტარიფები, მაგრამ რაღაც დრამატული გავლენა ამას ქართულ ეკონომიკაზე არ ექნება", - განაცხადა ზალკალიანმა.
შეგახსენებთ, რომ რუსეთმა საქართველოსთან თავისუფალი ვაჭრობის შეთანხმება შეაჩერა. რუსული მედიის ინფორმაციით, რუსეთის ეკონომიკის სამინისტრომ რუსეთ-საქართველოს შორის თავისუფალი ვაჭრობის შესახებ შეთანხმების მოქმედების შეჩერების შესახებ დადგენილების პროექტი შეიმუშავა. რუსული მედიისვე ცნობით, ინფორმაციაში აღნიშნულია, რომ 18 ივლისს საქართველოს პარლამენტმა მოახდინა ევროკავშირთან ასოცირების შეთანხმების რატიფიცირება. ამ შეთანხმების უმეტესი პუნქტი, მათ შორის, ღრმა და ყოვლისმომცველი თავისუფალი ვაჭრობის შესახებ ძალაში 1-ელი სექტემბრიდან შედის. როგორც რუსეთის ეკონომიკის სამინისტროს პროექტშია აღნიშნული, ხელშეკრულების მოქმედების შეჩერება შეთანხმებულია რუსეთის საგარეო საქმეთა სამინისტროსთან, ეკონომიკის განვითარებისა და იუსტიციის სამინისტროებთან. შეგახსენებთ, რომ საქართველოსა და რუსეთს შორის თავისუფალი ვაჭრობის შეთანხმებას ხელი 1994 წლის 3 თებერვალს მოეწერა.
