უზენაესი სასამართლოს თავმჯდომარე კოტე კუბლაშვიოლი პრემიერ-მინისტრის ირაკლი ღარიბაშვილის განცხადებას ეხმიანება და აცხადებს, რომ არავისგან არ სჭირდება შეხსენება თუ რა უნდა გააკეთოს მოსამართლეთა დასაცავად.
,,ბევრი ასეთი ავყია ადამიანი დადის ხოლმე სასამართლოში და რაღაც თავის განცხადებებს აკეთებს და მოსამართლეებისთვის ეს უცხო არ არის. მოსამართლეები ძალიან კარგად უმკლავდებიან ასეთ რიგითი მოქალაქეების, ადამიანების, თუ მხარეთა წარმომადგენლების მხრიდან ასეთ შეფასებებს. მათ აქვთ უფლებამოსილება, რომ თუკი დარბაზიდან ადამიანი ადგება და რაღაცას იტყვის, დააჯარიმოს, ან გააძევოს დარბაზიდან. ამიტომ ეს ფაქტი თავისთავად არავითარ საფრთხეს არ ქმნის. ასეთ დროს კი არ სჭირდებათ მოსამართლეებს დაცვა, როცა თავად აქვთ შესაძლებლობა ამის გაკეთების, არამედ მაშინ, როცა არ გაგრძელდეს ხელისუფლების უმაღლეს წარმომადგენლების მხრიდან პირდაპირი თავდასხმები მოსამართლეების მიმართ", -განაცხადა კუბლაშვილმა.
უზენაესი სასამართლოს თავმჯდომარემ პრემიერ-მინისტრს მოუწოდა თავად მოხდინოს რეაგირება აღმასრულებელი და საკანონმდებლო ხელისუფლების წარმომადგენლების მხრიდან გაკეთებულ განცხადებებზე, როცა ისინი კონკრეტულ მოსამართლეებზე საუბრობენ.
„მეც ძალიან გაოცებული ვარ ირაკლი ღარიბაშვილის პასიურობით, მაშინ როცა მისი გუნდის ერთ-ერთი წევრი, მთავრობის წარმომადგენელი, მინისტრი გამოდის სულ ახლახან მოხდა ეს და მოსამართლეების მიმართ პირდაპირ ზეგავლენას ახორციელებს ტელევიზიით, პირდაპირი ეთერით. გაოცებული ვარ, რატომ არ ამბობს, რომ ეს არის პირდაპირი გავლენის მოხდენა მოსამართლეებზე", - განაცხადა კუბლაშვილმა.
შეგახსენებთ, რომ პრემიერმა უზენაეს სასამართლოს თავმჯდომარის მიმართ პრეტენზია იმის გამო გამოთქვა, რომ მან სააპელაციო სასამართლოს ერთ-ერთი მოსამართლე უკრაინის ყოფილი შს მინისტრი იური ლუცენკოს გამოთქმული განცხადების გამო არ დაიცვა. ,,მე მეჩვენება, ამ მოსამართლეს ვანო მერაბიშვილის უფრო ეშინია, ვიდრე ვანოს მოსამართლის გადაწყვეტილების", _განაცხადა ლუცენკომ, რომელიც ყოფილი პრემიერის ვანო მერაბიშვილის პროცესს დაესწრო.
"ჩემთვის, როგორც მოქალაქისთვის ეს ფაქტი კატეგორიულად მიუღებელი და კატასტროფული და შეურაცხმყოფელი იყო. არ აქვს მნიშვნელობა ვინ არის და რომელი ქვეყნის მოქალაქეა, მას არ აქვს უფლება, რომ სუვერენული სახელმწიფოს დამოუკიდებელი სასამართლოს მოსამართლეს ამგვარი შეურაცხმყოფელი სიტყვებით მიმართოს. ამ მიმართულებით კოტე კუბლაშვილის პასიურობამ გამაოცა. მე როგორც მოქალაქეს მიმაჩნია, რომ ეს ფაქტი მიუღებელი იყო. კუბლაშვილს უნდა დაეცვა მოსამართლის ღირსება და ძალიან საეჭვოა, რატომ არ გააკეთა არანაირი რეაგირება", _განაცხადა პრემიერმა ,,იმედის ეთერში.