საქართველოს სახელმწიფო ბიუჯეტში გადასახადების კუთხით შემოსავლების მობილიზების პროცესი შეუფერხებლად და წარმატებით მიმდინარეობს. ამის შესახებ განცხადება 10 ივლისს გამართულ ბრიფინგზე შემოსავლების სამსახურის უფროსმა ირაკლი გვარამაძემ გააკეთა.
ირაკლი გვარამაძის განცხადებით, შემოსავლების სამსახურმა გადაჭარბებით შეასრულა მიმდინარე წლის 6 თვის გეგმა. საანგარიშო პერიოდში გადასახადების სახით ბიუჯეტში მობილიზებულია დაგეგმილზე 250 მილიონი ლარით მეტი, რაც სამსახურის მიერ არჩეული სტრატეგიის სისწორესა და მართებულობას ადასტურებს. სამსახურის უფროსის ინფორმაციით, ამ თანხების მობილიზებამ ხელი შეუწყო ცალკეული მნიშვნელოვანი პროექტის შეუფერხებლად განხორციელებას. კერძოდ, წარმატებით სრულდება პროექტი დაუბეგრავი მინიმუმის შესახებ, რომლის ფარგლებში კანონით განსაზღვრული 3 თვის განმავლობაში 400 ათასზე მეტ მოქალაქეს, საერთო ანგარიშით, 125 მილიონ ლარზე მეტი დაუბრუნდა. ირაკლი გვარამაძის განმარტებით, პროექტი გრძელდება და ის მოქალაქეები, რომლებით კანონით დადგენილი წესით ჩააბარებენ დეკლარაციებს, დაუყოვნებლივ მიიღებენ კუთვნილ თანხას.
ირაკლი გვარამაძის განცხადებით, შემოსავლების სამსახური ახალ ეტაპზე გადადის ზედმეტად გადახდილი თანხების დაბრუნების კუთხითაც. ეს ნიშნავს, რომ გადამხდელებს, რომლებსაც ასევე კანონით განსაზღვრულ 90 დღეში ეკუთვნით თანხის დაბრუნება, ეს თანხა დაუბრუნდებათ გაცილებით ადრე. დღეისათვის გადამხდელებს უკვე 40 მილიონ ლარზე მეტი დაუბრუნდათ. „ჩვენი პრიორიტეტია, გადამხდელს კუთვნილი თანხა დაუბრუნდეს ვადაზე ადრე, რათა ხელი შევუწყოთ მისი ეკონომიკური საქმიანობის განვითარებას. ეს არის თანამშრომლობა, რომლის შედეგადაც განვითარდება ბიზნესი და ბიზნესმენს შესაძლებლობა ექნება შეუფერხებლად შეასრულოს კანონით დაკისრებული ვალდებულებები. ვფიქრობთ, ეს პოზიტიური მიდგომაა და ვცდილობთ, დაბრუნების ვადა კიდევ უფრო შევამციროთ", - განაცხადა ირაკლი გვარამაძემ.
შემოსავლების სამსახურის უფროსმა თვალსაჩინოებისათვის წარმოადგინა განვლილი წლების შესაბამისი პერიოდის მონაცემებიც, რომელთა თანახმად, 2011 წლის შესაბამის პერიოდთან შედარებით, მიმდინარე წლის 6 თვეში ბიუჯეტში მობილიზებულია 400 მილიონ ლარზე მეტი, 2012 წელთან შედარებით - ამავე ოდენობით მეტი, ხოლო 2013 წელთან შედარებით - 380 მილიონ ლარზე მეტი. ეს მონაცემები, ირაკლი გვარამაძის შეფასებით, ადასტურებს, რომ ეკონომიკისა და გადასახადების ზრდის დინამიკა დადებითია. „გადასახადების მობილიზების გეგმა გადაჭარბებით არის შესრულებული. სამსახური განაგრძობს მკაცრი ადმინისტრირების ფარგლებში კანონმდებლობის სრული დაცვით გადამხდელებთან მუშაობას. ყველა გადასახდში მატება გვაქვს, დასაბეგრი ბრუნვები იზრდება და გადასახადები მეტი შემოდის. სრული პასუხისმგებლობით ვაცხადებ: საქართველოს ბიუჯეტს გადასახადების კუთხით არანაირი საფრთხე არ ემუქრება. ამის საფუძველს გვაძლევს განვლილი 6 თვე და ვიმედოვნებ, რომ შემდეგი პერიოდშიც დადებით შედეგებს მივიღებთ. ეს არის ჩვენი პირდაპირი მოვალეობა და ძალას არ დავიშურებთ, რომ წლის ბოლო იყოს წარმატებული", - განაცხადა შემოსავლების სამსახურის უფროსმა.