საქართველოს პარლამენტის თავმჯდომარე დავით უსუფაშვილი ევროკავშირის სპეციალურ წარმომადგენელს სამხრეთ კავკასიაში და საქართველოში კრიზისის საკითხებში ელჩს, ჰერბერტ ზალბერს შეხვდა.
„მოხარული ვარ და მოველი თქვენთან თანამშრომლობას. ამისთვის გამოვიყენებ ყველა რესურსს, რაც გამაჩნია", - განაცხადა დავით უსუფაშვილმა.
როგორც ,,ჯი-ეიჩ-ენს" საკანონმდებლო ორგანოდან აცნობეს გაცნობითი ხასიათის შეხვედრაზე, მხარეებმა, კონფლიქტურ რეგიონებში არსებული მდგომარეობა განიხილეს და კონფლიქტების მოწესრიგების საკითხისადმი საქართველოს მთავრობის ხედვებსა და მიდგომებზე ისაუბრეს.
დავით უსუფაშვილმა სტუმარს კონფლიქტების დარეგულირებასთან დაკავშირებით მისეული ხედვა გააცნო. „ქვეყანა უნდა გახდეს მიმზიდველი აფხაზებისა და ოსებისთვის. ევროკავშირთან ასოცირების ხელშეკრულება, რომელიც საქართველოს ევროპასთან გვაახლოებს უნდა გახდეს ერთ-ერთი საშუალება იმისა, რომ აფხაზები და ოსები მეტად დაინტერესდნენ ჩვენი ქვეყანით", - აღნიშნა პარლამენტის თავმჯდომარემ შეხვედრისას.
როგორც ელჩმა ჰერბერტ ზალბერმა აღნიშნა, ევროკავშირი მხარს უჭერს საქართველოს ტერიტორიულ მთლიანობასა და სუვერენიტეტს. მან მზადყოფნა გამოთქვა მისი მოღვაწეობის პერიოდში პოზიტიური როლი შეასრულოს კონფლიქტების მოწესრიგების საკითხში.
შეხვედრაზე საუბარი, ძირითადად, ჟენევის მოლაპარაკებებს შეეხო, სადაც საქართველოს კონფლიქტურ რეგიონებში შექმნილი კრიზისი განიხილება. ახალდანიშნული ელჩი მოლაპარაკების მაგიდასთან ევროკავშირს წარმოადგენს. ელჩმა იმედი გამოთქვა, რომ მისი წარმომადგენლობის პერიოდში პროცესს არაერთი სიახლე შეემატება, რომელიც ამ მოლაპარაკებებზე დადებით გავლენას იქონიებს.
შეხვედრაზე საუბარი შეეხო აფხაზეთში განვითარებულ მოვლენებს და ცხინვალის რეფერენდუმის საკითხებს. პარლამენტის თავმჯდომარის თქმით, მოვლენების ყველა ასეთ განვითარებას საქართველო და ქართველი პოლიტიკოსები უნდა შეხვდნენ დიპლომატიური სიდინჯით და ისე შემუშავდეს სამოქმედო გეგმა.
ელჩმა შეხვედრაზე აღნიშნა ისიც, რომ არსებობს დიდი და პატარა პრობლემები. მას მიაჩნია, რომ ამ პატარა პრობლემების მოგვარებით დიდი პრობლემის მოგვარება იქნება შესაძლებელი. მან დიდი მოლოდინი გამოთქვა ჟენევის მოლაპარაკებებთან დაკავშირებით. „მოლაპარაკების მაგიდასთან ამ პატარა საკითხების მოგვარებით, შესაძლებელია, საბოლოოდ დიდი პრობლემა მოგვარდეს. მონაწილეები მოელიან მოლაპარაკების ფორმატს. ჟენევის ფორმატი არის ერთადერთი ფორმატი, სადაც შესაძლებელია ამ პრობლემების მოგვარება", - აღნიშნა სპეციალურმა წარმომადგენელმა სამხრეთ კავკასიაში და საქართველოში კრიზისის საკითხებში ელჩმა ჰერბერტ ზალბერმა და იმედი გამოთქვა, რომ მოლაპარაკება ყველა მხარის მონაწილეობით შედეგის მომცემი იქნება.
პარლამენტის თავმჯდომარემ ელჩს მადლობა გადაუხადა და საპასუხისმგებლო საქმეში წარმატებები უსურვა.
პარლამენტის თავმჯდომარესთან შეხვედრაში, ასევე, მონაწილეობდნენ სამხრეთ კავკასიაში ევროკავშირის სპეციალური წარმომადგენლის კაბინეტის ხელმძღვანელი ბიორნ კუნე და სპეციალური წარმომადგენლის რეგიონული ოფისის ხელმძღვანელი მარტა ფრიმანი
