კომპანია "ჩირინა" 49 ათას 300 ლარად 349 303 კვ.მ მიწის ფართობის მფლობელი გახდა, სადაც სამომავლოდ მეფრინველეობის ფერმას ააშენებს. საქართველოს მთავრობის №820 განკარგულების თანახმად, კომპანია „ჩირინას"პირდაპირი მიყიდვის ფორმით მიეყიდა გარდაბნის მუნიციპალიტეტში, სოფელ სართიჭალის ტერიტორიაზე მდებარე ექვსი ერთეული სასოფლო-სამეურნეო (სახნავი) დანიშნულების მიწის ნაკვეთები, რომლის საერთო ფართობიც ჯამში - 349 303 კვ.მ-ს შეადგენს.
პირობების მიხედვით, „ცირინას" განესაზღვრა, რომ კომპანია ვალდებულია გადაცემულ უძრავ ნივთზე ან/და გარდაბნის მუნიციპალიტეტში, სოფელ სართიჭალაში მდებარე სხვა მიწის ნაკვეთზე (ნაკვეთებზე), შესაბამისი ხელშეკრულების გაფორმებიდან არა- უმეტეს 2 წლის ვადაში, მეფრინველეობის ფერმა ააშენოს და ექსპლუატაციაში შეიყვანოს.
ნაკისრი ვალდებულების შესრულებისთვის კი კომპანიას არანაკლებ 800 000 ლარის ინვესტიციის განხორციელებაც დაევალა.
„ჩირინა" ვალდებულია ასევე, მეფრინველეობის ფერმის მშენებლობის დასრულების შემდგომ, 1 თვის ვადაში, ამავე ფერმაში არანაკალებ 8 ადამიანის დასაქმება, არანაკლებ 1 წლის ვადით;
ასევე, ნიადაგის ნაყოფიერებისა და ხარისხის შენარჩუნება-გაუმჯობესების მიზნით, „ჩირინას" 5 წელიწადში ერთხელ, ნიადაგის ანალიზის შესაბამისი დამადასტურებელი დოკუმენტის/დასკვნის საქართველოს სოფლის მეურნეობის სამინისტროსათვის წარდგენა ევალება.
