პოლიტიკურ საკითხთა ექსპერტი კახა კახიშვილი მიიჩნევს, რომ სასჯელაღსრულების სისტემაში გაცემულ პრემიებთან დაკავშირებით გამოძიება უნდა დაიწყოს და გაირკვეს, რა დამსახურების მიხედვით მიიღეს სისტემის თანამშრომლებმა ამ ოდენობის თანხები.
როგორც კახიშვილმა "ჯი-ეიჩ-ენ"-თან საუბარში აღნიშნა,საქმის გამოძიების შემთხვევაში არ არის გამორიცხული, კონკრეტული პირების პასუხისმგებლობის საკითხი დადგეს.
"რატომ ინარჩუნებს დიმტრი დარბაისელი თანამდებობას, ამაზე პასუხი სოზარ სუბარმა უნდა გაგვცეს. რეალურად უწყების მინისტრი არის სოზარ სუბარი, აქედან გამომდინარე, მუდმივად საუბარი იმაზე, რომ მართალია მინისტრი ვარ, მაგრამ, ვერაფერს ვერ განვკარგავ, ვერაფერს ვერ ვწყვეტ, ეს განცხადება თავად მინისტრისთვისაც უხერხული უნდა იყოს"-აღნიშნა მან.
კახიშვილის თქმით, სასაჯელაღსრულების სამინისტრო სულ ორი დეპარტამენტისგან შედგება და თუ ორიდან ერთს, მინისტრი ვერ აკონტროლებს, გაუგებარია, საერთოდ რაში გვჭირდება სამინისტრო, ან მინისტრი, რომელიც საკუთარი გამგეობის ქვეშ მყოფ დეპარტამენტს ვერ აკონტროლებს.
"დიმიტრი დარბაისელს არ ვიცნობ, მაგრამ ფაქტია, რომ თუ ამ პრემიების რაოდენობა დადასტურდა და როგორც ჩანს, დადასტურებულია, უნდა დაიწყოს გამოძიება. სიმართლე გითხრათ, მე ამას პრემიას ვერ დავუძახებ. საქართველოს სისხლის სამართლის კოდექსში არის მოქმედი მუხლი, რომელიც ითვალისწინებს სისხლის სამართლის პასუხისმგებლობას მითვისება გაფლანგვისთვის. ჩემი აზრით, ასეთი რაოდენობის თანხების მიღებაზე აუცილებლად უნდა დაიწყოს გამოძიება და გამოძიების ფარგლებში უნდა დადგინდეს კონკრეტულად რის საფუძველზე, რა დამსახურების მიხედვით მიიღეს კონკრეტულმა თანამშრომლება ამ რაოდენობის თანხები"-განაცხადა კახიშვილმა.
იმ შემთხვევაში, თუ გამოძიება ვერ დაადგენს კონკრეტულ დამსახურებას, რატომ მიიღო ადამიანმა ერთი წლის ხელფასი ერთ დღეში პრემიის სახით, მაშინ, ექსპერტის აზრით, ადგილი უნდა ჰქონდეს როგორც მითვისებას, ისე გაფლანგვას და კონკრეტული პირების პასუხისმგებლობის საკითხი უნდა დადგეს.
