თუ არ იქნება რთული პოლიტიკური მოვლენები, რაღაც სხვა გართულებები, დარწმუნებული ვარ, რომ საქართველო შეძლებს ეკონომიკური პროგრესის გაუმჯობესებას - ამის შესახებ ევროკომისიის პრეზიდენტმა ჯოზე მანუელ ბაროზომ ბრიუსელში, საქართველოს პრემიერ-მინისტრ ირაკლი ღარიბაშვილთან შეხვედრის შემდეგ გამართულ ერთობლივ პრესკონფერენციაზე განაცხადა.
"აღნიშნული ხელშეკრულება არ გახლავთ სტანდარტული სახის ხელშეკრულება. ეს არის ეკონომიკური ინტეგრირებისა და პოლიტიკური ასოცირების ხელშეკრულება - სრული წვდომა ევროპის ბაზარზე, რომელიც ყველაზე დიდია მსოფლიოში. ძალიან ადვილია გავიგოთ, რომ მცირე თუ მსხვილი ბიზნესისთვის საქართველოში ძალიან მნიშვნელოვანია არა მარტო ქართულ ბაზარზე გათვლის გაკეთება, რომელიც შეზღუდულია, რადგან დიდი ქვეყანა საქართველო არ გახლავთ, არამედ ჰქონდეს წვდომა მსოფლიოში ყველაზე დიდ ბაზარზე", - განაცხადა ბაროზუმ.
მისივე თქმით, ღრმა და ყოვლისმომცველი თავისუფალი ვაჭრობის ხელშეკრულება ძალიან მნიშვნელოვანია.
„რა თქმა უნდა, ბევრი რამ თქვენზეა დამოკიდებული, ვინაიდან ეს ასევე გულისხმობს თქვენი ეკონომიკის მოდერნიზაციას, რომ თქვენი კომპანიები უფრო კონკურენტუნარიანი გახდნენ. მაგრამ საკმაოდ დიდ წარმატებებს მიაღწიეთ უკანასკნელი წლების განმავლობაში, გქონდათ ძალიან მაღალი მიზნები დასახული, რასაც აღწევდით და თუ არ იქნება რთული პოლიტიკური მოვლენები, რაღაც სხვა გართულებები, დარწმუნებული ვარ, რომ საქართველო შეძლებს ეკონომიკური პროგრესის გაუმჯობესებას", - აღნიშნა ბაროზუმ.
ევროკომისიის პრეზიდენტის თქმით, ღრმა და ყოვლისმომცველი თავისუფალი სავაჭრო სივრცის შესახებ შეთანხმება საერთაშორისო, მით უმეტეს ევროპელი ინვესტორებისთვის ძალიან მნიშვნელოვანია.
