საპარლამენტო უმრავლესობის წევრი თამარ კორძაია მიიჩნევს, რომ ევროკავშირთან ასოცირების ხელშეკრულებას ხელი პრეზიდენტმა უნდა მოაწეროს.
"პრეზიდენტი არის სახელმწიფოს მეთაური, ის არის წარმმართველი სახელმწიფოს ურთიერთობებში. მეორე საკითხია ის რომ საქართველოს მთავრობა და პარლამენტი განსაზღვრავს ქვეყნის საგარეო პოლიტიკურ კურსს. მე ვთვლი რომ სახელმწიფოს მეთაური არის საქართველოს პრეზიდენტი და მან უნდა მოაწეროს ასოცირების შეთანხმებას ხელი", - განაცხადა კორძაიამ ,,პრაიმ ტაიმის" პრესკლუბში.
შეგახსენებთ, რომ არსებული ინფორმაციით, ევროკავშირთან ასოცირების ხელშეკრულებისთვის ხელი მოწერას პრემიერ-მინისტრი ირაკლი ღარიბაშვილი აპირებს. აღნიშნულ საკითხს პრეზიდენტი გიორგი მარგველაშვილი გუშინ ,,იმედის" ეთერშიც გამოეხმაურა და აღნიშნა, რომ ევროკავშირთან ასოცირების ხელშეკრულებას ხელი პრეზიდენტმა უნდა მოაწეროს.
,,ეს არის უმნიშვნელოვანესი ხელშეკრულება, რომლის ხელის მოწერაც არის სტრატეგიული საქართველოსთვის. შესაბამისად, მე შემიძლია გითხრათ, რომ ამის თაობაზე აუცილებლად ჩატარდება კონსულტაციები და ისიც შემიძლია დავაფიქსირო, რომ ჩემთვისაც ასევე ძალიან მნიშვნელოვანია, საქართველომ მოაწეროს ხელი. ჩემთვის არ არის მართლა პრინციპული და მე ამ საკითხს არ გამოვედავები, თუ იქნება პოზიცია, რომ ხელი მოაწეროს რომელიმე სხვა ლეგიტიმურმა პირმა, მაგრამ მიმაჩნია, რომ პრეზიდენტმა უნდა მოაწეროს ხელი, გამომდინარე იქიდან, რომ ხელშეკრულება მოიცავს როგორც აღმასრულებელი, ასევე საკანონმდებლო და სასამართლო ხელისუფლებაში განსახორციელებელ პროცესებს. შესაბამისად, მგონია, რომ უპრიანია, როდესაც სახელმწიფოს მეთაური აწერს ხელს, თუმცა ლეგიტიმურია, რომ სხვა პირმაც მოაწეროს ხელი", - განაცხადა მარგველაშვილმა.
