საქართველოს საგარეო საქმეთა სამინისტროს ინიციატივით, მიმდინარე წლის 23-26 მაისს თბილისს არარეზიდენტი ელჩები ეწვევიან. აღსანიშნავია, რომ ამ ინიციატივის ფარგლებში პირველად მოხდება საქართველოში აკრედიტებული არარეზიდენტი ელჩების ერთიანი შეკრება.
23 მაისს დიპლომატიური კორპუსისთვის გაიმართება კონფერენცია - „პრეზენტაცია საქართველოზე", რომელსაც დაესწრებიან საქართველოს აღმასრულებელი ხელისუფლების წევრები, საქართველოში აკრედიტებული, როგორც არარეზიდენტი ელჩები, ასევე თბილისში მოღვაწე დიპლომატიური კორპუსის წარმომადგენლები. კონფერენციის მონაწილეებს მთავრობის წევრები ინფორმაციას მიაწვდიან საქართველოს საგარეო პოლიტიკური სტრატეგიის, ქვეყნის ეკონომიკური განვითარების, საინვესტიციო, სატრანსპორტო, ტურისტული პოტენციალის თაობაზე. საუბარი შეეხება სხვადასხვა მიმართულებით საქართველოს ხელისუფლების მიერ გატარებულ რეფორმებს.
24-25 მაისს ღონსძიების ფარგლებში არარეზიდენტი და თბილისში მოღვაწე დიპლომატიური კორპუსის წარმომადგენლები სამცხე-ჯავახეთის რეგიონს ესტუმრებიან. ღონისძიების ფარგლებში დიპლომატები გაეცნობიან სამცხე-ჯავახეთს, ეწვევიან რეგიონის ცალკეულ ქალაქსა და დაბებს და შეხვედრებს გამართავენ რეგიონის ხელმძღვანელობასთან, მოინახულებენ საქართველოს კულტურული მემკვიდრეობის ძეგლებს.
დიპლომატებისთვის შემეცნებით-კულტურული ტურის ორგანიზატორები არიან საქართველოს საგარეო საქმეთა სამინისტრო, ტურიზმის ეროვნული სააგენტო, კულტურის სამინისტრო, „საქართველოს რკინიგზა".
