იუსტიციის მინისტრისა და უწყებათაშორისი კომისიის თავმჯდომარის თეა წულუკიანის განცხადებით, ის შეშფოთებულია წინასაარჩევნო პერიოდში საარჩევნო სუბიექტების სააგიტაციო პლაკატების დაზიანების შემთხვევებით. წულუკიანმა უწყებათაშორისი კომისიის სხდომაზე მუნიციპალიტეტებს, მოუწოდა გააორმაგონ მუშაობა რათა სააგიტაციო მასალა ხელშეუხებელი იყოს.
,,პირადად ვარ შეშფოთებული ზოგიერთი მოქალაქის და აქტივისტის ქმედებით, რომელიც ბედავს და არასასურველი კანდიდატის პლაკატებს აზიანებს. ზოგიერთი უფრო შორსაც მიდის და სხვის პლაკატზე სხვა მასალას აკრავს. ზოგიერთი იტყვის, რომ ეს პატარა პრობლემაა, ადრე ქვას ისროდნენ, მაგრამ ესეც მნიშვნელოვანი პრობლემაა. მინდა მივმართო მუნიციპალიტეტებს, გაორმაგდეს ძალისხმევა, რომ სააგიტაციო მასალა იყოს ხელშეუხებელი, რათა კანდიდატებს მიეცეთ დარჩენილი პერიოდის განმავლობაში ჯანსაღი კონკურენციის პირობებში ბრძოლა", - განაცხადა წულუკიანმა.
