საქართველოს საინვესტიციო შესაძლებლობებზე, მიმდინარე რეფორმებსა და მთავრობის ეკონომიკური პოლიტიკის ძირითად მიმართულებებზე ისაუბრეს საინვესტიციო სესიაზე „Georgia - New frontier for Opportunities", რომელიც 14 მაისს ევროპის რეკონსტრუქციისა და განვითარების ბანკის წლიური შეხვედრისა და ბიზნეს-ფორუმის ფარგლებში გაიმართა. ღონისძიება პოლონეთის დედაქალაქ ვარშავაში ჩატარდა.
საინვესტიციო სესიაზე მოხსენებებით გამოვიდნენ საქართველოს ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი, ფინანსთა მინისტრი, ევროპის რეკონსტრუქციისა და განვითარების ბანკში საქართველოს მმართველი ნოდარ ხადური, ევრობანკის დირექტორი სამხრეთ კავკასიაში, მოლდოვასა და ბელარუსში ბრუნო ბალვანერა, აგრეთვე კომპანია „ქლინ ენერჯი გრუფის" აღმასრულებელი დირექტორი რაგნარ ზოგარდი და „აიდიეს-ბორჯომის" აღმასრულებელი დირექტორი ზაზა კიკვაძე.
საინვესტიციო სესიის ყველა მონაწილეს დაურიგდა საქართველოს პრემიერ-მინისტრის, ირაკლი ღარიბაშვილის სპეციალური მიმართვა პოტენციური ინვესტორების მიმართ.
საინვესტიციო სესიაზე გამოსვლისას, ვიცე-პრემიერმა გიორგი კვირიკაშვილმა ვრცლად ისაუბრა საქართველოს მთავრობის ეკონომიკურ პოლიტიკაზე, საინვესტიციო პოტენციალსა და იმ აქტივობებზე, რომელიც ხორციელდება საქართველოში სამეწარმეო აქტივობის გაზრდის მიზნით.
გიორგი კვირიკაშვილმა შეხვედრის მონაწილეები მოიწვია ევრობანკის მომდევნო წლიურ შეხვედრაზე, რომელიც 2015 წელს თბილისში ჩატარდება. მისი თქმით, ეს არის უმნივნელოვანესი და უპრეცედენტო მასშტაბის საერთაშორისო ფორუმი, რომლის მსგავსიც კავკასიაში ჯერ არ ჩატარებულა.
ფინანსთა მინისტრმა, ნოდარ ხადურმა პოტენციურ ინვესტორებსა და EBRD-ის ხელმძღვანელობას გააცნო ქვეყნის მაკროკონომიკური პარამეტრები, ქვეყნის სოციალურ-ეკონომიკური განვითარების სტრატეგიის "საქართველო 2020"-ის ძირითადი მიმართულებები და პრიორიტეტები. მან ასევე ისაუბრა საქართველოში არსებული საგადასახადო სისტემის სიმარტივესა და მდგრადობაზე.
საინვესტიციო სესიას დაესწრნენ საქმიანი წრეების წარმომადგენლები, რომლებიც ევრობანკის წლიურ შეხვედრაში მონაწილეობენ. მათ განსაკუთრებული ყურადღება დაუთმეს იმ სექტორებს, სადაც დიდია ინვესტორთა ინტერესი - კერძოდ, ასეთებია ენერგეტიკა, ფინანსურ სექტორი, ინფრასტრუქტურა, ტრანსპორტი, სოფლის მეურნეობა, ტურიზმი და წარმოება.
სესიაზე საკუთარი წარმატებული ბიზნეს-პროექტების შესახებ ისაუბრეს მსხვილი უცხოური კომპანიების წარმომადგენლებმა, რომლებიც საქართველოში ბიზნესს ეწევიან. მათ დამსწრე საზოგადოებას გააცნეს საქართველოში არსებული ხელსაყრელი საინვესტიციო გარემო და კოლეგებს საკმაოდ ეფექტურად აუხსნეს, თუ რატომ უნდა დაიწყონ ბიზნესი საქართველოში.
შეხვედრაზე ასევე დიდი იყო ინტერესი ევროპასთან ღრმა და ყოვლისმომცველი თავისუფალი ვაჭრობის შეთანხმებაზე, რომელიც ევროკავშირთან ასოცირების შეთანხმების ხელმოწერის შემდეგ ამოქმედდება.
საინვესტიციო სესიის დასრულების შემდეგ მონაწილეებმა დაათვალიერეს საქართველოს ტურისტული და ბიზნესკლიმატის ამსახველი სტენდები და დააგემოვნეს ქართული ღვინო.
ევრობანკის მომდევნო წლიური შეხვედრა 2015 წელს თბილისში ჩატარდება, რომლის მუშაობაშიც 1500 დელეგატი, მათ შორის, უმსხვილესი საერთაშორისო კორპორაციების ხელმძღვანელი პირები მიიღებენ მონაწილეობას.
