შერიგებისა და სამოქალაქო თანასწორობის საკითხებში სახელმწიფო მინისტრის პაატა ზაქარეიშვილის განცხადებით, საოკუპაციო ხაზის მიმდებარე ტერიტორიებიდან გატაცებული მოქალაქეების გასათავისუფლებლად სახელმწიფო ძალიან ეფექტურ ზომებს იღებს და მოლაპარაკებებში ძირითადად ჩართულია შს სამინისტრო.
როგორც ზაქარეიშვილმა ჟურნალისტებთან საუბარში განაცხადა, ის ხალხი, ვინც ამ შემთხვევაში აწარმოებს გარკვეულ სამუშაოს გამყოფი ხაზის გასწვრივ და ხდება საოკუპაციო რეჟიმის მსხვერპლი, დარწმუნებულია, რომ საქართველო მათ გვერდში დგას.
"თუმცა, ყველას მოვუწოდებთ და ვთხოვთ, მაქსიმალურად ფრთხილად იყვნენ გამყოფი ხაზის გასწვრივ, მითუმეტეს ახლა, ივნისში დაგეგმილი ასოცირების ხელშეკრულების ხელმოწერის კონტექსტში გამორიცხული არ არის შედარებით მეტი ზემოქმედება და პროვოკაციები, ვინაიდან ჩვენი ყველაზე უფრო სუსტი ადგილი არის ჩვენი მოქალაქეები, როცა მათ წინააღმდეგ ხდება ზემოქმედება", - განაცხადა ზაქარეიშვილმა.
სახელმწიფო მინისტრის განცხადებით, ის უკვე მრავალი წელია, გათავისუფლების მოლაპარაკებებშია ჩართული და ისე სწრაფად დაკავებულთა გათავისუფლება, როგორც ახლა ხდება, არასდროს ხდებოდა.
რაც შეეხება იმას, რომ ამ ადამიანებს გათავისუფლებისთვის ჯარიმის გადახდა უწევთ, პაატა ზაქარეიშვილი აცხადებს, რომ სახელმწიფო ნამდვილად არ იხდის ამ გადასახადს, თუმცა ვინ იხდის, არ იცის.
ბოლო პერიოდში, საჩხერის რაიონში საოკუპაციო ე.წ. საზღვრის დარღვევის გამო რუსმა ოკუპანტებმა რამდენიმე ათეული საქართველოს მოქალაქე დააკავეს.
როგორც წესი, დაკავებულები ცხინვალის იზოლატორში გადაჰყავთ, შემდეგ დე ფაქტო სასამართლოში ასამართლებენ და 2000 რუბლის ოდენობით ე.წ. ადმინისტრაციული ჯარიმის გადახდის სანაცვლოდ ათავისუფლებენ.