საქართველოს ტერიტორიული მთლიანობის პრობლემა კვლავ არსებობს საერთაშორისო თანამეგობრობისთვისაც, - ამის შესახებ საფრანგეთის პრეზიდენტმა ფრანსუა ოლანდმა საქართველოს პრეზიდენტთან ერთად გამართულ პრესკონფერენციაზე, განაცხადა.
მისივე თქმით, საქართველოში მისი ვიზიტი მხოლოდ ერთ მიზანს ისახავს - გამოხატოს საფრანგეთის მხარდაჭერა საქართველოსადმი, მხარი დაუჭიროს საქართველოს სუვერენიტეტს და ტერიტორიულ მთლიანობას, მხარი დაუჭიროს ასოცირების შეთანხმებას ევროკავშირსა და საქართველოს შორის.
"მხარი დავუჭიროთ საქართველოს ეკონომიკურ განვითარებას. უკვე რამდენიმე თვის წინ შესაძლებლობა მომეცა პირადად გავსაუბრებოდი საქართველოს ხელისუფლების წარმომადგენლებს. ბატონ პრეზიდენტთან შეხვედრა იყო ვილნიუსის სამიტზე, პრემიერთან კი ჰააგაში, ბირთვული უსაფრთხოების სამიტზე. გავიმეორებ იმას, რაც საქართველოს ხელისუფლების წარმომადგენლებს მოვახსენე. საქართველოს ტერიტორიული მთლიანობა, რომელიც დღესდღეობით არ არის დაცული და აღდგენილი და სამწუხაროდ, ეს პრობლემა კვლავ არსებობს საერთაშორისო თანამეგობრობისთვისაც. ბატონმა პრეზიდენტმა როგორც აღნიშნა, 2008 წლის ხელშეკრულება ცეცხლის შეწყვეტის შესახებ ბოლომდე არ სრულდება", - განაცხადა ოლანდმა.
