საქართველოს ეკონომიკისა და მდგრადი განვითარების მინისტრი გიორგი კვირიკაშვილი უძრავი ქონების მართვის საერთაშორისო კომპანიის, Colliers International-ის ევროპის, ახლო აღმოსავლეთისა და აფრიკის რეგიონების ხელმძღვანელს, კრის მაქლერნონს შეხვდა. სამინისტროში გამართულ შეხვედრას ასევე დაესწრნენ მეწარმეობის განვითარების სააგენტოს დირექტორი გიორგი ციკოლია და კომპანიის წარმომადგენლები.
კრის მაქლერნონის თბილისში ვიზიტი კომპანია Colliers International-ის საქართველოს ბაზარზე ოპერირების დაწყებას უკავშირდება. კომპანიის წარმომადგენელთა განცხადებით, მათი მიზანი უძრავი ქონების მფლობელებსა და ინვესტორებისთვის საქართველოში მომსახურების ახალი სტანდარტის შეთავაზება და მსოფლიოს ფინანსურ ბაზრებთან დაკავშირებაა.
"Colliers International"-ის გენერალური დირექტორი ორდღიანი ვიზიტის ფარგლებში მთავრობისა და ბიზნესწრეების წარმომადგენლებს შეხვდება. ამასთან, კრის მაქლერნონი თბილისში Colliers International Georgia-ს ლიცენზირებულ ოფისს გახსნის.
Colliers International Georgia სრულ მომსახურებას სთავაზობს ინვესტორებს, უძრავი ქონების მესაკუთრეებს, მოიჯარეებსა და დეველოპერებს. კომპანიის ძირითად მიმართულებებს უძრავი ქონების დეველოპმენტის სერვისი, კორპორატიული ბროქერიჯი, უძრავი ქონების კვლევა, კონსალტინგი და შეფასება წარმოადგენს.
