მსოფლიო ბანკის ჯგუფმა საქართველოსთან თანამშრომლობის ახალი სტრატეგია შეიმუშავა. ახალი სტრატეგია საქართველოს განვითარების საკითხებთან დაკავშირებული გეგმების განხორციელებასა და მდგრადი შედეგების მიღწევაში დაეხმარება. როგორც მსოფლიო ბანკის მიერ გავრცელებულ ინფორმაციაშია აღნიშნული. ბანკის ჯგუფის აღმასრულებელ დირექტორთა საბჭომ 2014-2017 წლების საქართველოსთან თანამშრომლობის სტრატეგია განიხილა. აღნიშნული ოთხწლიანი თანამშრომლობის
პროგრამა მსოფლიო ბანკის მიერ ქვეყნისთვის სიღარიბის შემცირების და საერთო კეთილდღეობის ზრდის საქმეში გაწეული დახმარების კოორდინირებას მოახდენს.
საქართველოსთან თანამშრომლობის სტრატეგია ორ მთავარ სფეროს გამოყოფს, რომელთა დახმარებით დასახული ამოცანების მიღწევა უნდა მოხდეს: სახელმწიფო მომსახურების მიწოდების გაუმჯობესება ყოვლისმომცველი ეკონომიკური ზრდის ხელშესაწყობად და, გაუმჯობესებული კონკურენტუნარიანობის მეშვეობით, კერძო სექტორის განვითარებაზე დაფუძნებული სამუშაო ადგილების შექმნის ხელშეწყობა.
აღნიშნული თანამშრომლობის სტრატეგია საქართველოს მთავრობის მიერ შემუშავებულ სოციალურ - ეკონომიკური განვითარების სტრატეგიასთან -საქართველო 2020 თანხვედრაშია.
მსოფლიო ბანკში აცხადებენ, რომ საერთო მიზანი უფრო სწრაფი, ყოვლისმომცველი და მდგრადი ეკონომიკური ზრდის მიღწევასა და,
ამავე დროს, სოციალურ შედეგებსა და სიღარიბის შემცირებაზე უფრო მეტი ყურადღების გამახვილებაში მდგომარეობს.
ახალი სტრატეგიის მიხედვით მსოფლიო ბანკის ჯგუფის მიერ დაახლოებით 1.2 მილიარდი დოლარის ოდენობის ფინანსური დახმარება იქნება გამოყოფილი, რომელიც რეკონსტრუქციისა და განვითარების
საერთაშორისო ბანკის სესხებისგან, საერთაშორისო საფინანსო კორპორაციის (IFC-ის) ინვესტიციებისა და მრავალმხრივი საინვესტიციო გარანტიების სააგენტოს მიერ გაცემული დაზღვევისგან შედგება
