8 მაისს, ვიცე-პრემიერი, ეკონომიკისა და მდგრადი განვითარების მინისტრი, გიორგი კვირიკაშვილი და შინაგან საქმეთა მინისტრი ალექსადნრე ჭიკაიძე ბათუმის ნავსადგურში, ამერიკული საზღვაო ძალების ფრეგატ "ტეილორზე" მიღებას დაესწრნენ.
სტუმრებს ამერიკის შეერთებული შტატების ელჩი საქართველოში რიჩარდ ნორლანდი და ფრეგატ "ტეილორის" კაპიტანი მურზბან მორისი მასპინძლობდნენ.
ვიცე-პრემიერმა გიორგი კვირიკაშვილმა ამერიკული ხომალდი დაათვალიერა, სადაც ხვალ დილიდან ამერიკელი სამხედროები საქართველოს საზღვაო დაცვის თანამშრომლებისთვის წვრთნებს ჩაატარებენ.
ხომალდის დათვალიერების შემდეგ ბათუმის ნავსადგურში შეკრებილ საზოგადოებას ვიცე-პრემიერმა სიტყვით მიმართა.
,,ის ფაქტი, რომ დღეს ბათუმში ამერიკის შეერთებული შტატების საზღვაო ძალების წარმომადგენლები იმყოფებიან, ისინი, ვინც ნატოს ეგიდით საერთაშორისო უსაფრთხოებას იცავენ, კიდევ ერთხელ ადასტურებს ჩვენს ქვეყნებს შორის მრავალმხრივი სტრატეგიული პარტნიორობის
მნიშვნელობას, მათ შორის სამხედრო სფეროში. უკვე არაერთი წელია, 1999 წლიდან საქართველო ჩართულია ნატოს სამშვიდობო მისიებში. ქართველი სამხედროები აქტიურად მონაწილეობენ
საერთაშორისო უსაფრთხოების უზრუნველყოფისათვის მიმართულ ოპერაციებში, რითიც ჩვენ ძალიან ვამაყობთ.საქართველოსთან ოფიციალური ვაშინგტონის მიერ დიპლომატიური ურთიერთობების დამყარების დღიდან, აშშ-მ საქართველოს დიდი პოლიტიკური, სამხედრო, ფინანსური და ჰუმანიტარული დახმარება გაუწია. ამერიკის შეერთებული შტატები არის საქართველოს სუვერენიტეტის ერთ-ერთი უმთავრესი საერთაშორისო გარანტორი. აშშ-მ არაერთხელ დაადასტურა, რომ მტკიცედ უჭერს მხარს საქართველოს ტერიტორიულ მთლიანობას და ქვეყნის ევროატლანტიკური ინტეგრაციის პროცესს. შესაბამისად, უდიდესი მნიშვნელობა ენიჭება 2009 წლის 9 იანვარს ვაშინგტონში საქართველოსა და აშშ-ს შორის ხელმოწერილ სტრატეგიული პარტნიორობის ქარტიას, რომელიც უსაფრთხოებისა და თავდაცვის, ეკონომიკისა და ვაჭრობის, ენერგეტიკის და სხვა სფეროებში თანამშრომლობის გაფართოების, დემოკრატიული ინსტიტუტების გაძლიერების და ხალხთა შორის ურთიერთობების გაღრმავების მიმართულებით ურთიერთობის უმნიშვნელოვანეს ჩარჩოს წარმოადგენს,-‘'განაცხადა გიორგი კვირიკაშვილმა.
ამერიკული ფრეგატი "ტეილორი" საქართველოს ტერიტორიულ წყლებში უკვე მესამედ შემოვიდა. ფრეგატის პირადი შემადგენლობა, საქართველოს სანაპირო დაცვის თანამშომლებთან ერთად, ჩაატარებს წვრთნებს გემზე ასვლის, მისი ჩხრეკისა და დაკავების, აგრეთვე გემზე სამედიცინო დახმარების აღმოჩენის, კარიერული განვითარებისა და სამეთაურო ეთიკის საკითხებში.
„ტეილორის" საქართველოში ყოფნა ხაზს უსვამს შეერთებული შტატების სურვილს, გააძლიეროს ურთიერთობები ნატოელ მოკავშირეებსა და ნატოს პარტნიორ ქვეყნებთან, როგორიც საქართველოა და მათთან ერთად ხელი შეუწყოს რეგიონში მშვიდობისა და სტაბილურობის გამტკიცებას.
