იუსტიციის სამინისტროს საჯარო რეესტრის ეროვნული სააგენტო არჩევნებში მონაწილე სუბიექტების საარჩევნო კამპანიის ფონდებს არეგისტრირებს. ადგილობრივი თვითმმართველობის წინასაარჩევნო პროცესის კანონიერებისა და საარჩევნო სუბიექტების დაფინანსებასთან დაკავშირებული პროცესის გამჭვირვალობის უზრუნველყოფის მიზნით, საარჩევნო სუბიექტის საინიციატივო ჯგუფი ვალდებულია კანონმდებლობით დადგენილი წესით დააფუძნოს საარჩევნო კამპანიის ფონდი და დაარეგისტრიროს საჯარო რეესტრში, როგორც არასამეწარმეო (არაკომერციული) იურიდიული პირი (სახელმწიფო აუდიტის სამსახურის გენერალური აუდიტორის 2014 წლის 23 აპრილის №76/37 ბრძანების შესაბამისად).
საბანკო ანგარიშის გახსნის მოთხოვნის შემთხვევაში, საჯარო რეესტრში საარჩევნო სუბიექტის საინიციატივო ჯგუფის მიერ დაფუძნებული ფონდის სახელზე საბანკო დაწესებულებაში ანგარიში უფასოდ გაიხსნება.
საარჩევნო კამპანიის ფონდის რეგისტრაციისთან დაკავშირებული კონსულტაციის მიღება შესაძლებელია საჯარო რეესტრის ეროვნული სააგენტოს ტერიტორიულ სარეგისტრაციო სამსახურებში, იუსტიციის სახლებსა და ავტორიზებულ პირებთან, აგრეთვე იუსტიციის სახლის ცხელ ხაზზე: 2 405 405; სააგენტოს facebook-ის ოფიციალურ გვერდზე და ელექტრონული ფოსტით: info@napr.gov.ge.
საარჩევნო კამპანიის ფონდის დასარეგისტრირებლად, არჩევნებში მონაწილე სუბიექტის საინიციატივო ჯგუფმა უნდა მიმართოს საჯარო რეესტრის ეროვნული სააგენტოს ტერიტორიულ სარეგისტრაციო სამსახურებს, იუსტიციის სახლებს, ავტორიზებულ პირებს და წარადგინოს შემდეგი დოკუმენტაცია:
· არასამეწარმეო (არაკომერციული) იურიდიული პირის დამფუძნებელთა/წევრთა შეთანხმება (წესდება);
· სააგენტოს მომსახურების საფასურის გადახდის დამადასტურებელი დოკუმენტი.
საარჩევნო კამპანიის ფონდის სარეგისტრაციო მომსახურების საფასური 1 სამუშაო დღეში შეადგენს 100 ლარს, დაინტერესებული პირის მიერ დაჩქარებული მომსახურების მოთხოვნის შემთხვევაში, იმავე სამუშაო დღეს - 200 ლარს.