უკანონო მოსმენებთან დაკავშირებით კანონპროექტი პარლამენტმა შესაძლოა, 15 მაისამდე პირველი მოსმენით მიიღოს.
როგორც საპარლამენტო უმრავლესობის წევრმა შალვა შავგულიძემ ჟურნალიტებს განუმარტა, არასამთავრობო სექტორის რამდენმე წარმომადგენელმა პარლამენტს საკანონმდებლო წინადადებით მიმართა, რის საფუძველზეც პარლამენტის იურიდიულმა კომიტეტმა საკანონმდებლო წინადადებაც შეიმუშავა.
მისი თქმით, ამის შემდეგ უწყებათაშორისი სამუშაო ჯგუფი შეიქმნა, რომელშიც შსს-ს, იუსტიციისა და სასამართლოს სისტემის წარმომადგენლები შევიდნენ.
"კანონპროექტზე ევროპის საბჭოს ექსპერტებისგან მივიღეთ დადებითი დასკვნა. პრემიერმა უსაფრთხოების საბჭოს დაავალა იგივე საკითხის დამუშავება. ამ პერიოდში პარლმენტის იურიდიულ კომიტეტში დაწყებული იყო უკანონო მოსმენებთან დაკავშირებით საკითხის განხილვაც. არის თემები, რომელთა სამუშაო რეჟიმში დახვეწა აუცილებელია, თუმცა კანონპროექტზე პოზიციები ძირითადად შეჯერებულია. მომავალ სასესიო კვირაში კიდევ მოხდება კანონპროექტზე მუშაობა და იმედი მაქვს, 15 მაისამდე პირველი მოსმენით მივიღებთ მას", - აცხადებს შალვა შავგულიძე.
ამასთან, საქართველოს მთავრობის საპარლამენტო მდივნის, შალვა თადუმაძის თქმით, უკანონო სატელეფონო მოსმენებთან დაკავშირებით კანონპროექტის მიღება შეიძლება თვითმმართველობის არჩევნებამდე ვერ მოხერხდეს.
