,,საქსტატის" წინასწარი მონაცემების პირველი კვარტლის შედეგები ძალიან დამაიმედებელია, არის 7%-ზე მეტი ზრდა, რომელიც, რა თქმა უნდა, გაგრძელდება. ბიუჯეტი დაგეგმილი გვაქვს 5%-იან ზრდაზე. არ ვიცი, ვნახოთ როგორ განვითარდება მოვლენები. რა თქმა უნდა, გარკვეული საგრეო ფაქტორები საქართველოს ექსპორტსა და იმპორტზე იქონიებენ გავლენას. თუმცა ჩვენ მაინც იმედიანად ვართ რომ წლის ბოლომდე, დაახლოებით, 6%-ის ფარგლებში საქართველოს ეკონომიკის რეალური ზრდა გვექნება", _განაცხადა კვირიკაშვილმა.

მისივე განცხადებით, ქვეყნის საგარეო ვაჭრობის მონაცემებიც საკმაოდ დადებითი ტენდენციით ვითარდება.

,,საგარეო ვაჭრობის მონაცემებიც საკმაოდ დადებითი ტენდენციით ვითარდება. ძალიან ბევრი პროექტი დამუშავების ფაზაში და ვფიქრობ, რომ წლის მეორე ნახევარში ეს ყველაფერი აისახება. განწყობა მთლიანად ეკონომიკაში საკმაოდ ოპტიმისტურია", _განაცხადა კვირიკაშვილი.

წინასწარი შეფასებით, წინა წლის შესაბამის პერიოდთან შედარებით 2014 წლის მარტში რეალური მთლიანი შიდა პროდუქტის ზრდის ტემპმა 8,3 პროცენტი, ხოლო 2014 წლის I კვარტალის საშუალო რეალურმა ზრდამ 7,4 პროცენტი შეადგინა.
2012 წლის იანვრიდან საქსტატი ყოველთვიურად აწარმოებს ეკონომიკის ზრდის ყოველთვიურ წინასწარ შეფასებებს, რომელიც იანგარიშება უწყებრივი სტატისტიკის (დღგ-ის გადამხდელი საწარმოების ბრუნვების, ფისკალური და მონეტარული მონაცემების) საფუძველზე. აღნიშნული შეფასებები წარმოადგენს საერთაშორისოდ მიღებულ პრაქტიკას, რომელსაც იყენებენ მოკლევადიანი წინასწარი ოპერატიული მონაცემების მისაღებად. იმ სფეროებში, სადაც ყოველთვიური მონაცემები (მაგალითად, სოფლის მეურნეობა, დაუკვირვებადი ეკონომიკის მოცულობა) არ მოიპოვება, შეფასება გაკეთებულია წინა პერიოდის მონაცემებზე დაყრდნობით. შესაბამისად, რეალური კვარტალური გაანგარიშებები შესაძლოა მნიშვნელოვნად განსხვავდებოდეს წინასწარი შეფასებისგან.