უკრაინის ხელისუფლებამ ქალაქ სლავიანსკის დაბლოკვის გადაწყვეტილება მიიღო. ინფორმაციას ამის შესახებ უკრაინული მედია ავრცელებს. მათივე ინფორმაციით, ამ გადაწყვეტილების მიღება საჭირო იმიტომ გახდა, რომ სეპარატისტებს დამხმარე ძალის შეყვანის საშუალება არ მიეცეთ.
„დონეცკის ოლქის ქალაქ სლავიანსკში ანტიტერორისტული ოპერაციის მეორე ეტაპი დაიწყო, რომლის მიზანია დასახლებულ პუნქტში ტერორისტების ბლოკირება",_ განაცხადა პრეზიდენტის ადმინისტრაციის უფროსის მოვალეობის შემსრულებელმა სერგეი პაშინსკიმ დღეს გამართულ ბრიფინგზე.
„20 წუთის წინ ანტიტერორისტული ოპერაციის ფარგლებში ოპერაციის მეორე ეტაპი დაიწყო - ჩვენ მივიღეთ გადაწყვეტილება მთლიანად დავბლოკოთ ქალაქი სლავიანსკი და არ მივცეთ საშუალება დამხმარე ძალის შეყვანისა",_ აცხადებს პაშინსკი.
მისივე თქმით, ღამით ჩატარებულმა დაზვერვამ ცხადყო, რომ ტერორისტებმა თავიანთი პუნქტები საბავშვო ბაღებსა და საავადმყოფოების შენობებში განათავსეს.
„არავითარი პოლიტიკა. სლავიანსკში კლასიკური ტერორისტები არიან, რომლებიც ქალებსა და ბავშვებს ფარად იყენებენ",- განაცხადა პაშინსკიმ და აღნიშნა, რომ ყველა ტერორისტი ან დაპატიმრებული ან ლიკვიდირებული იქნება.