საქართველოს პარალამენტის მიერ „საგადასახადო კოდექსში" შეტანილი ცვლილებები ძალაში სწორედ ივნისიდან შედის, შედეგად, 200 000 ლარზე მეტის ბრუნვის მქონე იმპორტიორები შეღავათით ვეღარ ისარგებლებენ.

ცვლილებები საგადასახადო კოდექსში 162 მუხლში შევიდა და იმ ნაწილების ამოღება მოხდა, რომელიც იმპორტის დღგ-ით დაბეგვრის სპეციალურ წესი განსაზღვრავდა. კერძოდ, გაუქმდა 162-ე მუხლის მე-2 ნაწილი, რომელიც მიხედვითაც, პირს, რომლის წინა უწყვეტი 12 კალენდარული თვის განმავლობაში დასაბეგრი ოპერაციების მიხედვით დეკლარირებული და ბიუჯეტში გადახდილი დღგ-ის თანხა გადააჭარბებდა 200 000 ლარს, უფლება ეძლეობა გადასულიყო იმპორტის დღგ-ით დაბეგვრის სპეციალურ წესზე.

ასევე გაუქმდა მუხლი, რომელიც შემოსავლების სამსახურის უფროსს ანიჭებდა უფლებამოსილებას რომ პირი გადაეყვანა იმპორტის დღგ-ით დაბეგვრის სპეციალურ წესზე, თუ იგი წარმოადგენდა წერილობით ვალდებულებას, რომ აღნიშნულ წესზე გადასვლიდან მომდევნო უწყვეტი 12 კალენდარული თვის განმავლობაში განახორციელებდა საწარმოს ძირითად საშუალებად გამოსაყენებელი ან/და საწარმოს ძირითადი საშუალებისათვის განკუთვნილი, არანაკლებ 5 მლნ ლარის საბაჟო ღირებულების საქონლის იმპორტს.
საგადასახადო კოდექსში შესატანი ცვლილება საპარლამენტო ფრაქციამ „ქართული ოცნება- მრეწველები" მოამზადა. კანონპროექტის ავტორები მიიჩნევენ, რომ ეს მუხლი არაკონკურენტულ გარემოს ქმნიდა იმ პირთა მიმართ, რომლებთაც ამ ოდენობის ბრუნვა არ გააჩნდათ. (ასეთად შეიძლება მოაზრებული იქნას საშუალო და მცირე ბიზნესის წარმომადგენლები) და ამავე დროს იმპორტიორები ადგილობრივ მეწარმესთან შედარებით უკეთეს პირობებში ექცეოდნენ, რადგან საქონლის იმპორტისას მეწარმეს შეეძლო დღგ-ს დაბეგვრის სპეციალური რეჟიმით ესარგებლა და გარკვეული პერიოდის განმავლობაში ე.წ. თავისუფალი ფულის წარმოშობის შედგეგ გადაეხადა გადასახადი, ხოლო ადგილობრივი ნედლეულის შეძენისას პირი ასეთი რეჟიმით ვერ ისარგებლებდა. ვინაიდან ამ შემთხვევაში, საქონლის ღირებულება მოიცავს დღგ-ს თანხას და, შესაბამისად, პირი დღგ-ს საქონლის შეძენისთანავე იხდის.
აღსანიშნავია, რომ გარკვეული შეღავათით სარგებლობენ ე.წ „ოქროს სიაში" მყოფი პირები, რომლებსაც იმპორტის დღგ-ს გადასახდელად 30 დღიანი ვადა აქვთ.