"სამედიცინო კორპორაცია ევექსი" საქართველოში ყველაზე მსხვილი ჰოსპიტალური ქსელია, რომელიც მართავს 36 სამედიცინო ცენტრს. კომპანიის მთავარი მიზანი ქსელის მასშტაბით საერთაშორისო სტანდარტების სამედიცინო სერვისების დანერგვა და დამკვიდრებაა. ამ მიზნით "სამედიცინო კორპორაცია ევექსსა" და ქართულ-ინტერნაციონალური სამედიცინო და საზოგადოებრივი ჯანდაცვის ასოციაციას (GIMPHA) შორის ურთიერთთანამშრომლობის მემორანდუმი გაფორმდა.

მემორანდუმის ფარგლებში მოეწყობა GIMPHA-ს წევრების სამუშაო ვიზიტები ქსელის სამედიცინო დაწესებულებებში, ჩატარდება საერთაშორისო სამედიცინო სემინარები, მათ შორის განხილული იქნება რთული და კომპლექსური კლინიკურ შემთხვევები ქსელის მედპერსონალთან, მოხდება ჯანდაცვასთან დაკავშირებული პროცესებისა და ინოვაციების შესახებ ინფორმაციის ურთიერთგაცვლა და პროექტების ერთობლივი შემუშავება/განხორციელება.

2014 წლის ოქტომბერში თბილისში "სამედიცინო კორპორაცია ევექსის" მხარდაჭერით საერთაშორისო სამედიცინო სემინარი ჩატარდება. სემინარზე მოწვეული იქნებიან უცხოელი და ქართველი სპეციალისტები, სამედიცინო სასწავლო დაწესებულების პროფესორები და სტუდენტები, საქართველოს სხვადასხვა სამედიცინო ასოციაციები, ჰოლანდიის საელჩო საქართველოში და სხვა პირები.

შეგახსენებთ, რომ ქართულ-ინტერნაციონალური სამედიცინო და საზოგადოებრივი ჯანდაცვის ასოციაცია (GIMPHA) 25 თანამემამულე კოლეგამ 11 სხვადასხვა სახელმწიფოდან 2012 წელს ამსტერდამში დაარსა. ასოციაციაში გაერთიანებულია სხვადასხვა სამედიცინო სპეციალობის წარმომადგენელი, რომელთა მიზანი საქართველოს მოსახლეობისთვის სამედიცინო მომსახურების განვითარების ხელშეწყობაა.