თბილისის მერობის კანდიდატი ნიკა მელია დღეს, ექსპერტებსა და არასამთავრობო ორგანიზაციების წარმომადგენლებს შეხვდა. შეხვედრაზე „ერთიანი ნაციონალური მოძრაობის" მერობის კანდიდატმა სტუმრებს ქალაქში ახალ, ეკოლოგიურად სუფთა და სწრაფ სატრანსპორტო საშუალებაზე - ტრამვაის პროექტის განხორციელებასთან დაკავშირებით, საკუთარი ხედვა გააცნო და აღნიშნულ საკითხზე მათი მოსაზრებები მოისმინა.
ეკოლოგიური მდგომარეობის გაუმჯობესების მიზნით, თბილისის მერიამ ტრამვაის პროექტის განსახორციელებად 2010 წელს ფრანგულ საინჟინრო კომპანია „სისტრასთან" თანამშრომლობის მემორანდუმი გააფორმა. მემორანდუმის თანახმად, თბილისის მოსახლეობის გამოკითხვაზე დაყრდნობით, მომზადდა ტრამვაის ქსელის ტექნიკური პროექტი, ეკონომიკური, გარემოსდაცვითი და ფინანსური ანალიზი.
პროექტის მიხედვით, ტრამვაის ხაზი 14 კილომეტრის სიგრძის იქნება და ის უნივერსიტეტის მაღლივი კორპუსიდან ვაკის გავლით ორთაჭალას დაუკავშირდება. ამ მანძილს მგზავრები უმოკლეს ვადაში 34 წუთში დაფარავენ. თანამედროვე მუნიციპალური ტრანსპორტი ყოველდღიურად 100 000-ზე მეტი მგზავრის მომსახურებას შეძლებს.
პროექტის განხორციელების შემდეგი ეტაპი დაფინანსებასთან არის დაკავშირებული, რადგან ის საკმაოდ მაღალ ბიუჯეტიანია, შესაბამისად საჭიროა სხვადასხვა საერთაშორისო საფინანსო ინსტიუტებთან მოლაპარაკებები და ასევე ბიუჯეტში საამისოდ აუცილებელი თანხის ჩადება.