"დემოკრატიული მოძრაობა-ერთიანი საქართველოს" ლიდერი, ნინო ბურჯანაძე აშშ-ს დელეგაციის წარმომადგენლებს ქვეყანაში შექმნილ საარჩევნო გარემოზე ესაუბრა, სადაც განაცხადა, რომ საქართველოში არ დაადგა საშველი იმას, რომ საარჩევნო გარემო იყოს ნორმალური.
"მმართველი პარტია არ ზრუნავს იმაზე, რომ რეალურად კონკურენტული გარემო შექმნას, არ იყოს საზოგადოების ზურგს უკან გარიგებები, არ იყოს ხელოვნურად შექმნილი სასათბურე პირობები "ქართული ოცნებისა" და "ნაციონალური მოძრაობისათვის". როდესაც საპრეზიდენტო არჩევნების დროს "სპორტის სასახლეში" გავმართეთ გრანდიოზული შეხვედრა მხარდამჭერებთან, ტელეკომპანიებმა უარი გვითხრეს ღონისძიების პირდაპირ ეთერში გაშუქებაზე, მაშინ როდესაც "ნაციონალური მოძრაობის" შეკრება პირდაპირ ეთერში გადაიცემოდა, სადაც გაცილებით ნაკლები ხალხი იყო წარმოდგენილი. სამწუხაროდ, იგივე მეორდება დღესაც, ჩვენ არ გვაძლევენ პირდაპირი ჩართვის შესაძლებლობას დღეს საღამოს, რიყეზე დაგეგმილი ღონისძიებიდან, სადაც კოალიცია "ბურჯანაძე - ერთიანი ოპოზიცია" ოფიციალურად გამოვაცხადებთ წინასაარჩევნო კამპანიის გახსნას და წარვადგენთ მერობის კანდიდატს", - განაცხადა შეხვედრის დაწყებამდე "დემოკრატიული მოძრაობის" ლიდერმა ნინო ბურჯანაძემ.
მისივე თქმით, ეს მეტყველებს იმაზე, რომ "დემოკრატიული მოძრაობა" აშკარად დისკრიმინაციულ მდგომარეობაშია და ყველაფერი კეთდება იმისათვის, რომ შენარჩუნდეს ხელოვნური ორპარტიული სისტემა და "ნაციონალები" მობრუნდნენ ხელისუფლებაში.
ვაშინგტონის მაღალი რანგის დელეგაციისა და არასაპარლამენტო ოპოზიციური პარტიების ლიდერების მონაწილეობით "საქართველოში პოლიტიკური გარემოს საკითხებზე" "ქორთიარდ მარიოტში", დღეს მრგვალი მაგიდა გაიმართა, რომელსაც აშშ-ს სახელმწიფო მდივნის თანაშემწის მოადგილე, თომას მელია და აშშ-ს ელჩი საქართველოში, რიჩარდ ნორლანდი ესწრებოდნენ.
