საპარლამენტო უმცირესობის ლიდერი დავით ბაქრაძე შინაგან საქმეთა სამინისტროს სპეციალური ოპერატიული დეპარტამენტის ყოფილ დირექტორს ერეკლე კოდუასა და ამავე დეპარტამენტის სამმართველოს უფროსს გია სირაძეს ბრალის დამძიმებას ეხმიანება და აცხადებს, რომ პროკურატურა არ უნდა იძიებდეს მხოლოდ ცხრა წლის წინანდელ საქმეებს, არამედ უნდა გამოიძიოს ის დანაშაულებიც, რომელიც დღეს ხდება.
,,ნდობისთვის საჭიროა პროკურატურა იძიებდეს არა მხოლოდ ცხრა წლის წინანდელ საქმეებს და დაკავებული იყოს არა მხოლოდ წარსულთან ბრძოლით, არამედ იძიებდეს იმ საქმეებს, რომელიც დღეს ჩვენ თვალწინ ხდება. მათ შორის დეპუტატ წიკლაური ცემის ფაქტს, მათ შორის ბარბარე რაფალიანცის გარდაცვალების ფაქტს. მათ შორის შალვა თათუხაშვილის ცემისა და გარდაცვალების ფაქტს. პროკურატურა როცა დაკავდება ყველა ფაქტის გამოძიებით მაშინ უქნება ნდობა მის მიმართ და მაშინ იქნება საზოგადოების მხრიდან აღქმა რომ პროკურატურა სიმართლის დადგენას ემსახურება და არ წარმოადგენს პოლიტიკური ანგარიშსწორების ნაწილს", _განაცხადა ბაქრაძემ.
შეგახსენებთ, რომ მთავარმა პროკურატურამ დეპუტატ ვალერი გელაშვილის ცემის ფაქტზე შინაგან საქმეთა სამინისტროს სპეციალური ოპერატიული დეპარტამენტის ყოფილ დირექტორს ერეკლე კოდუას და ამავე დეპარტამენტის სამმართველოს უფროსს გია სირაძეს ბრალი დაუმძიმა.
