პარლამენტის თავმჯდომარის, დავით უსუფაშვილის განცხადებით, შტაინამიერმა და ფაბიუსმა ისინი დაარწმუნა, რომ ევროკავშირში გაწევრიანებისა და ნატო-ში ინტეგრაციის გზაზე საფრანგეთი და გერმანია საქართველოს მხარს უჭერენ და ის სტერეოტიპი, რომ ამ ქვეყნებს აღმოსავლეთ ევროპისგან განსხვავებული პოზიცია აქვთ, დაიმსხვრა.
დავით უსუფაშვილი საპარლამენტო უმრავლესობის და უმცირესობის წევრებთან ერთად გერმანიისა და საფრანგეთის საგარეო საქმეთა მინისტრებს შეხვდა.
მისი განმარტებით, გერმანიას, საფრანგეთს და შესაძლოა, ზოგიერთ სხვა ქვეყანას შეიძლება ჰქონდეს დამატებითი კითხვები, არგუმენტები და მოსაზრებები ტაქტიკასთან დაკავშირებით, თუ როგორ უნდა გაგრძელდეს პროცესი და არა იმაზე, უნდა შედგეს თუ არა ეს პროცესი.
"ორივე მინისტრმა ნატო-ს ბუქარესტის სამიტის გადაწყვეტილება დაადასტურა. დღეს ვმსჯელობდით იმაზე, რომ ნატო-ს სექტემბრის სამიტზე საქართველოსთვის და ნატო-სთვის სასარგებლო გადაწყვეტილება იქნება მიღებული და ეს ყველაფერი პირველ რიგში საქართველოს უსაფრთხოების პრიორიტეტების კუთხით იქნება განხილული. იგივე შეეხება ევროკავშირთან ურთიერთობის პროცესსაც. მთავარი ამოცანა ასოცირების ხელშეკრულების ხელმოწერაა, ხოლო 10, 20, 25 წლის შემდეგ რა იქნება ეს იმაზე მინიშნებაა, რომ საქართველოს გაწევრიაენება შეიძება უფრო მალე მოხდეს ან შეიძლება უფრო გვიან, ეს არ იქნება პრინციპი, რომ ევროპა ჩაკეტილია და სამხრეთ კავკასიის ქვეყანა ევროპის წევრი ვერ გახდება. ეს ბარიერი იხსნება, ეს ბოლო მოვლენებია, რაც ჩვენი ქვეყნისთვის მნიშვნელოვანია და რაც ორივე მინისტრმა დაადასტურა", - განაცხადა უსუფაშვილმა.
პარლამენტის თავმჯდომარემ ასევე აღნიშნა, რომ შტაინმაიერისა და ფაბიუსის ვიზიტი განსაკუთრებით მნიშვნელოვანია, იმიტომ რომ ეს ისტორიაში პირველი შემთხვევაა, როდესაც საფრაგეთისა და გერმანიის საგარეო საქმეთა მინისტრები უცხო ქვეყანაში ერთად ჩადიან.
უსუფაშვილის განმარტებით, ეს იმას ნიშნავს, რომ საქართველო დღეისთვის ევროკავშირის ფუძემდებელი ყველაზე მნიშვნელოვანი სახელმწიფოების ყურადღების ცენტრშია.
უსუფაშვილმა ასევე აღნიშნა, რომ ვიზიტი პრაქტიკულად ევროკავშირის საერთო პოზიციების გამომხატველია.
