გერმანიის საგარეო საქმეთა მინისტრმა ფრანკ-ვალტერ შტაინმაიერმა ქართველ კოლეგასთან შეხვედრის შემდეგ. უკრაინაში მიმდინარე პროცესები შეაფასა და აღნიშნა, რომ საქართველოში განსაკუთრებული წუხილი არსებობს უკრაინის მოვლენებთან დაკავშირებით.
,,მთელი ენერგია უნდა მივმართოთ რათა ჟენევის მოლაპარაკებები იმგვარად წარვმართოთ, რომ ამან ასახვა ჰპოვოს უკრაინაში სიტუაციის დეესკალაციაზე. ჩვენ უკრაინის ხელისუფლებას ვუყენებთ მოთხოვნას შესრულდეს ჟენევის შეთანხმება. თუმცა მოთხოვნები არის რუსეთის მიმართაც, რომ მან ყველაფერი გააკეთოს იმისთვის, რათა რუსულენოვან მოსახლეობას მკაფიო გზავნილები გაუგზავნოს და მოხდეს დაკავებული შენობებისა და მოედნების გათავისუფლება", - განაცხადა შტაინმაიერმა და აღნიშნა, რომ დასავლეთი ყველაფერს გააკეთებს, რათა თავისი ფინანსური წვლილი შეიტანოს ეუთო-ს მისიის გაძლიერებაში.
მისივე განცხადებით, დასავლეთს არ სურს რუსეთთან დაპირისპირება.
ჩვენ არ გვინდა დაპირისპირება რუსეთთან, გვინდა თანამშრომლობა და ყოველთვის ვეტყვით რუსეთს, რომ ასოცირების შეთანხმება არის არა ვინმეს წინააღმდეგ მიმართული, არამედ, ეს არის საქართველოს თავისუფალი არჩევანი, რათა საქართველომ ევროპასთან ურთიერთობა გააღრმავოს. ჩვენ გვინდა თანამშრომლობა და არა კონფრონტაცია", - განაცხადა შტაინმაიერმა საქართველოსა და საფრანგეთის საგარეო საქმეთა მინისტრებთან შეხვედრის შემდეგ გამართულ პრესკონფერენციაზე.
