საქართველოს თავდაცვის ყოფილმა მინისტრმა ირაკლი ოქრუაშვილმა ცენტრალური საარჩევნო კომისიის გადაწყვეტილება, რომელიც მისთვის თვითმართველობის არჩევნებში კენჭისყრის აკრძალვას გულისხმობს, სასამართლოში გაასაჩივრა.
ოქრუაშვილის ადვოკატის ზვიად კორძაძის განცხადებით, სარჩელი მათ გუშინ შეიტანეს, სასამართლო პროცესი საქმეზე კი, დღეს, ან ხვალ გაიმართება.
"ირაკლი ოქრუაშვილი კანონმდებლობის ყველა მოთხოვნას აკმაყოფილებს, ამის მიუხედავად, ცესკომ ასე არ მიიჩნია. ოქრუაშვილის საცხოვრებელი ადგილი ყოველთვის იყო საქართველო. იურიდიულად, საცხოვრებელი ადგილი და ფიზიკური ყოფნა ერთი და იგივე არ არის. კანონი საქართველოში 2 წელი ფიზიკურ ყოფნას კი არა, იმას ითხოვს, რომ ადამიანს საცხოვრებელი ადგილი ჰქონდეს საქართველოში",- განაცხადა ზვიად კორძაძემ.
ცენტრალურმა საარჩევნო კომისიამ ბათილად ცნო გორის საოლქო საარჩევნო კომისიის გადაწყვეტილება, რომლის მიხედვითაც ირაკლი ოქრუაშვილი გორის მერობის კანდიდატად დარეგისტრირდა.
ცესკომ გადაწყვეტილების მიზეზად ის ფაქტი დაასახელა, რომ ირაკლი ოქრუაშვილი, კანონის შესაბამისად, ბოლო ორი წელი საქართველოში არ ცხოვრობდა.
გორის საოლქო საარჩევნო კომისიის გადაწყვეტილება, რომლის მიხედვითაც ირაკლი ოქრუაშვილი გორის მერობის კანდიდატად ოფიციალურად დაარეგისტრირეს, ორმა პარტიამ: "სახალხო პარტიამ" და "სამართილიანი საქართველო" გაასაჩივრა.
ირაკლი ოქრუაშვილის ადვოკატის თქმით, ყოფილი მაღალჩინოსანი საზღვარგარეთ იძულებით 2007-დან 2012 წლამდე ცხოვრობდა.
