თავდაცვის მინისტრი ირაკლი ალასანია პრემიერ-მინისტრის ირაკლი ღარიბაშვილის ინიციატივას დროულსა და საჭიროს უწოდებს. როგორც მთავრობის სხდომის დასრულების შემდეგ ალასანიამ განმარტა პრემიერ-მინისტრის გადაწყვეტილება ემსახურება იმას, რომ ყველა პოლიტიკურმა ძალამ თანაბარი პირობებში მიიღოს არჩევნებში მონაწილეობა.
,,პრემიერ-მინისტრის ინიციატივას რაც შეეხება ეს არის ძალიან დროული, საჭირო და სწორი ინიციატივა. ბოლო დღეების განმავლობაში ძალიან შემაშფოთებელ ფაქტებს ვაკვირდებოდით არა მხოლოდ თბილისში, არამედ რაიონებში. ჩვენ ვართ ის ხელისუფლება რომელმაც არ უნდა ოპონენტებს შორის ძალადობა და ამის სამარცხვინო ნიშნები ამ დღეების განმავლობაში იყო. პრემიერ-მინისტრის გადაწყვეტილება ემსახურება იმას, რომ ყველა პოლიტიკურ ძალას თანაბარი პირობებში შესაძლებლობა ჰქონდეს არჩევნებში მონაწილეობა მიიღოს", _განაცხადა ალასანიამ.
საქართველოს პრემიერ-მინისტრი ადგილობრივი თვითმმართველობის არჩევნებთან დაკავშირებით საარჩევნო კამპანიაში ჩართულ პირთა მიმართ სამართლებრივი პროცედურების განხორციელებაზე მორატორიუმს აცხადებს.
აღნიშნული წინადადებით საქართველოს პრემიერ-მინისტრმა სამართალდამცავ ორგანოებს მთავრობის დღევანდელ სხდომაზე მიმართა.
ირაკლი ღარიბაშვილის განმარტებით, ადგილობრივი თვითმმართველობის არჩევნები უნდა გახდეს კიდევ ერთი დემონსტრირება, რომ საქართველოში განხორციელდა რეალური ცვლილებები და ქვეყანას მართავს დემოკრატიის გზაზე მდგარი პოლიტიკური გუნდი, რომელიც თავისუფალი და სამართლიანი არჩევნები ჩატარების გარანტია.
„ჩვენ ყველაფერს გავაკეთებთ იმისთვის, რომ ყველა პარტიას მიეცეს სრულფასოვანი საარჩევნო კამპანიის ჩატარების საშუალება. სწორედ ამიტომ, მინდა გამოვაცხადო მორატორიუმი და მივმართო სამართალდამცავ ორგანოებს, წინასაარჩევნო პერიოდში მაქსიმალურად შეიკაონ თავი იმ პირთა უფლებების კანონიერი შეზღუდვისა და იმ პირების დაკავებისგან, რომლებიც აქტიურად მონაწილეობენ საარჩევნო კამპანიაში. ეს უნდა იყოს უკიდურესი ზომა და თან მხოლოდ იმ შემთხვევაში, თუ არსებობს მკაფიოდ დასაბუთებული, გადაუდებელი აუცილებლობა. ცალსახად მინდა აღვნიშნო, რომ ჩვენი მთავრობის მთავარი პრიორიტეტია არჩევნების პერიოდში პოლიტიკური თავისუფლების უზრუნველყოფა", - განაცხდა პრემიერმა.
ირაკლი ღარიბაშვილი ასევე მოუწოდებს მედიასაშუალებებს, ობიექტურად და მიუკერძოებლად მიაწოდონ საზოგადოებას სრული ინფორმაცია წინასაარჩევნო კამპანიის მიმდინარეობის შესახებ, ასევე მიმართავს საერთაშორისო და ადგილობრივ სადამკვირვებლო ორგანიზაციებს, ჩართონ კვალიფიციური დამკვირვებლები საარჩევნო პროცესის მონიტორინგში.
„მოგვაწოდონ შენიშვნები და რეკომენდაციები, რომლებსაც, გპირდებით, უყურადღებოდ არ დავტოვებთ. ჩვენი მიზანია, არჩევნების შედეგები მთლიანად ასახავდეს ხალხის ნებას. მჯერა, ადგილობრივი თვითმმართველობის არჩევნები, ისევე როგორც წინა, საპრეზიდენტო არჩევნები, იქნება სამაგალითო და უპრეცენდენტო არა მხოლოდ ჩვენი ქვეყნისთვის, არამედ რეგიონისთვის", - აღნიშნა ირაკლი ღარიბაშვილმა.
