ზუგდიდში, აქციის დაწყებამდე რამდენიმე წუთით ადრე, რამდენიმე ქალბატონი "ნაციონალური მოძრაობის" მომხრეებსა და ლიდერებს სიტყვიერად დაუპირისპირდა. მათ პარტიის ლიდერებს მკვლელები და ადამიანის გამაუპატიურებლები უწოდეს, რასაც სიტყვიერი და ფიზიკური დაპირისპირება მოჰყვა.

"ნაციონალური მოძრაობის" ერთ-ერთმა აქტივისტმა ამ პარტიის მოწინააღმდეგე ქალბატონს და ჟურნალისტებს წითელი სითხე შეასხა, რასაც სიტყვიერი დაპირისპირება მოჰყვა. ადგილზე მობილიზებულმა სამართალდამცავი ორგანოების წარმომადგენლებმა ინციდენტი მალევე განმუხტა.

საპარლამენტო უმცირესობის დეპუტატმა როლანდ ახალაიამ ზუგდიდში "ნაციონალური მოძრაობის" საარჩევნო კამპანიის გახსნაზე განაცხადა, რომ ახალი ეროვნული მოძრაობა უნდა დაიწყოს, რომელსაც სათავეში მიხეილ სააკაშვილი ჩაუდგება.

მისი თქმით, "ივანიშვილმა და ჰაკიმ ფაშამ სამეგრელო დააჩოქეს, თუმცა, მის გათავისუფლებას "ნაციონალური მოძრაობა" შეძლებს".

ზუგდიდში "ნაციონალური მოძრაობის" წინასაარჩევნო აქციაში პარტიის ლიდერები გიგა ბოკერია, გიგი უგულავა, ნუგზარ წიკლაური, როლანდ ახალაია და სხვები მონაწილეობდნენ.