პრეზიდენტი გიორგი მარგველაშვილი შს მინისტრის ალექსანდრე ჭიკაიძის განცხადებას ეხმიანება და აცხადებს, რომ საქართველოს დემოკრატიულ არჩევანს, ალტერნატივა არ გააჩნია.
,,ყველა ქვეყანაში შეიძლება არსებობდეს ნებისმიერი ჯგუფები, რომელსაც განსხვავებული აზრი გააჩნიათ დემოკრატიის, საზოგადოების სტაბილურობის, მისი თავისუფალი არჩევანის თაობაზე, წარმოადგენენ რადიკალურ ჯგუფებს, მაგრამ კონსოლიდირებული დემოკრატიის ქვეყნებში, ისეთში, როგორიც საქართველოა, ასეთი ჯგუფების არსებობა ვერ გახდება პოლიტიკური. შესაბამისად, ეს საკითხი ეხება უფრო სამართალდამცავ ორგანოებს, ამ ჯგუფების გაუვნებელყოფა ძალოვანი უწყების საქმეა, ხოლო როგორც პოლიტიკური სპექტრის წარმომადგენელი, გეტყვით: საქართველოს დემოკრატიულ არჩევანს, კურსს და ხელისუფლების დემოკრატიულ ცვლილებას ალტერნატივა არ გააჩნია", - განაცხადა გიორგი მარგველაშვილმა.
შეგახსენებთ, რომ საქართველოს შინაგან საქმეთა მინისტრი ალექსანდრე ჭიკაიძე „პრაიმ ტაიმთან" ინტერვიუში აცხადებს, რომ "ნაციონალური მოძრაობა" ევრომაიდნის სცენარს ამუშავებს და არსებობს ინფორმაციები, რომ ამ მიზნით უკვე დაწყებულია საბურავების მომარაგება.
