7 აპრილს საქართველოს ეკონომიკისა და მდგრადი განვითარების მინისტრის მოადგილემ მიხეილ ჯანელიძემ ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ შეთანხმების საკითხზე ბრიფინგი გამართა.
როგორც ბრიფინგზე აღინიშნა, ევროკავშირთან ასოცირების შეთანხმების უმნიშვნელოვანეს ნაწილს წარმოადგენს ღრმა და ყოვლისმომცველი თავისუფალი სავაჭრო სივრცის შესახებ შეთანხმება (DCFTA), რადგან სწორედ ის მოიცავს ევროკავშირთან ეკონომიკური ინტეგრაციის მექანიზმს და ეტაპობრივად ხსნის ევროკავშირის შიდა ბაზარ სსაქართველოსთვის.
შეთანხმება თავისი შინაარსით საკმაოდ რთულია და მოიცავს ვაჭრობასთან დაკავშირებულ საკითხთა ფართო სპექტრს, როგორიცაა სურსათის უვნებლობა, ინტელექტუალური საკუთრების დაცვა, კონკურენციის პოლიტიკა და სხვა. შეთანხმება ასევე გულისხმობს საქართველოს სავაჭრო კანონმდებლობის ეტაპობრივ დაახლოებას ევროკავშირის შესაბამის კანონმდებლობასთან.
იმისათვის, რომ საქართველოს თითოეული მოქალაქისთვის ხელმისაწვდომი და მარტივად აღსაქმელი იყოს შეთანხმების შინაარსი და მის იმპლემენტაციასთან დაკავშირებული ინფორმაცია, ეკონომიკისა და მდგრადი განვითარების სამინისტრომ თავის ვებგვერდზე აამოქმედა სპეციალური საინფორმაციო პორტალი. პორტალის მეშვეობით დაინტერესებულ მხარეებს შეუძლიათ, მიიღონ ყველა საჭირო ინფორმაცია შეთანხმების შესახებ. მათ შორის, შეთანხმების თითოეული თავის მოკლე მიმოხილვა, აღებული ვალდებულებები, მისაღები სარგებელი და ა.შ. პორტალზე ასევე განთავსება ყველა ინფორმაცია შეთანხმებასთან დაკავშირებული დაგეგმილი, მიმდინარე და განხორციელებული რეფორმების შესახებ და ეს ინფორმაცია მუდმივად განახლდება.
გარდა ამისა, შეთანხმებასთან დაკავშირებულ საკითხებზე ცნობიერების ამაღლების კუთხით სამინისტრო იწყებს ფართომასშტაბიან საინფორმაციო კამპანიას. კამპანიის ფარგლებში გაიმართება შეხვედრები კერძო სექტორის, სამოქალაქო საზოგადოებისა და სამეცნიერო წრეების წარმომადგენლებთან, როგორც თბილისში, ისე რეგიონებში.
პირველი ასეთი შეხვედრა უკვე მიმდინარე კვირას გაიმართება თბილისში და იგი მიეძღვნება საქონლით ვაჭრობისა და საბაჟო საკითხების განხილვას.
შეხვედრის გარდა, ეკონომიკისა და მდგარდი განვითარების სამინისტრო მზადაა უპასუხოს ყველა დაინტერესებულ პირს ინდივიდუალურად. ამისათვის, დაინტერესებულმა პირებმა უნდა მიმართონ სამინისტროს საგარეო ვაჭრობისა და საერთაშორისო ეკონომიკური ურთიერთობების დეპარტამენტს ან დაგვიკავშირდნენ სამინისტროს ცხელ ხაზზე (299 11 11 ) ან მიიღონ ინფორმაცია სამინისტროს ვებგვერდზე www.economy.ge.