შალვა თათუხაშვილის ოჯახის ადვოკატი ირაკლი ზაქარეიშვილი შალვა თათუხაშვილისთვის დაცვის ღონისძიების გამოყენების გაუქმების შესახებ პროკურორის დადგენილებას ასაჯაროებს. ირაკლი ზაქარეიშვილი აღნიშნულის მიზნით განცხადებას ავრცელებს, რომელსაც უცვლელად გთავაზობთ:
"საქართველოს მთავარი პროკურატურა აცხადებს, რომ შალვა თათუხაშვილი პოლიციამ აღმოაჩინა ლილოში, რის შემდეგაც პოლიციის განყოფილების შენობიდან მიიყვანა თბილისის პროკურატურის შენობაში. ვასაჯაროებ პროკურორის დადგენილებას შალვა თათუხაშვილის დაცვის ღონისძიების გაუქმების შესახებ. დადგენილების სამოტივაციო ნაწილი, უდავოდ მიუთითებს ფაქტზე, რომ პროკურატურა ცდილობდა შ. თათუხაშვილისათვის თავისუფლების უკანონო აღკვეთისა და სხვა ჩადენილი დანაშაულების კვალის დაფარვას. პროკურატურისგან ვითხოვ რა დაცვის ღონისძიების განხორციელების შესახებ შალვა თათუხაშვილის წერილობითი თანხმობის გასაჯაროებას, უკომენტაროდ გთავაზობთ პროკურორის დადგენილებას დაცვის ღონისძიების გამოყენების გაუქმების შესახებ", - ნათქვამია განცხადებაში.
პროკურატურის მტკიცებით, შალვა თათუხაშვილს პირადი დაცვა 24 თებერვალს დაენიშნა. 25 თებერვალს კი ის საცხოვრებელი სახლიდან გაიპარა და მოგვიანებით ლილოში იქნა ნაპოვნი.
