ევროკავშირი-საქართველოს საპარლამენტო თანამშრომლობის კომიტეტის თანათავმჯდომარეებმა, თინათინ ხიდაშელმა და მილან ცაბრნოხმა, ერთობლივი პრესკონფერენცია გამართეს და მედიის წარმომადგენლების თანდასწრებით იმ დოკუმენტს მოაწერეს ხელი, რომელიც შეიმუშავეს.
თინა ხიდაშელის განმარტებით, დოკუმენტის პირველ თავში საქართველოსა და ევროკავშირის ურთიერთობების შესახებ განაცხადია ასახული.
მისივე თქმით, დოკუმენტში ასევე ასახულია რეკომენდაციები საქართველოში დემოკრატიული რეფორმების შესახებ; იძულებით გადაადგილებული პირებისა და მათი მდგომარეობის გაუმჯობესების შესახებ და კონფლიქტების მშვიდობიანი გადაწყვეტის გზებზე.
„დოკუმენტში განსაკუთრებული სიახლე არის ის რამდენიმე ცვლილება, რომელიც ამ ორი დღის განმავლობაში შევიდა. 1. ასოცირების ხელშეკრულების ხელმოწერის ვადამ გადმოიწია ივნისში, რაც ტექსტში ოფიციალურად აისახა. მეორე ცვლილება კი ეხება 49-ე მუხლის გავრცელებას, სადაც საუბარია, რომ იმ შემთხვევაში, თუკი ევროპული სახელმწიფოები და საქართველო დაფიქსირებულია როგორც ასეთი სახელმწიფო, შეასრულებენ ადამიანის უფლებათა დაცვის, დემოკრატიის, უმცირებათა უფლებების დაცვის, კანონის უზენაესობის მოთხოვნებს, ასეთ შემთხვევაში მათ შეუძლიათ ევროკავშირის წევრობაზე განაცხადი გააკეთონ. ეს იყო ძალიან მნიშვნელოვანი ცვლილება რომელიც ამ დოკუმენტში აისახა", - განაცხადა თინა ხიდაშელმა.
მისივე თქმით, დოკუმენტში სრულად არის გაზიარებული ევროკავშირის სპეციალური წარმომადგენლის და ადამიანის უფლებათა დაცვის საკითხებში საქართველოს მთავრობის მრჩევლის, თომას ჰამერბერგის რეკომენდაციები.
ხიდაშელის განცხადებით, დოკუმენტში საუბარია იმ რეფორმებზე, რომელიც ქვეყანაში განხორციელდა, მათ შორის, ადგილობრივი თვითმმართველობის არჩევნების შესახებ მიღებულ კანონზე.
მისივე თქმით, საუბარია სამართალდამცავი ორგანოების და დემოკრატიული ინსტიტუტების უფრო მეტი გამჭვირვალეობის მოთხოვნისა და ანგარიშვალდებულების შესახებ. ასევე, იმაზე, რომ ყველა პოლიტიკურმა ძალამ საქართველოში თავი აარიდოს პოლიტიკური ანგარიშსწორებით მოტივირებული შერჩევითი სამართლის გამოყენებას.
ჟურნალისტის კითხვაზე, ხომ არ უკავშირდება აღნიშნული საკითხის დოკუმენტში ასახვა ექსპრეზიდენტის დაკითხვაზე დაბარებას, ევროკავშირი-საქართველოს საპარლამენტო თანამშრომლობის კომიტეტის თანათავმჯდომარემ, მილან ცაბრნოხმა განმარტა: „დღეს ეს თემა საქართველოში აქტუალურია და საზოგადოება დაინტერესებულია. თუმცა, კონკრეტულად ეს ჩვენი განხილვის თემა არ ყოფილა, არ გვისაუბრია კონკრეტულ ადამიანებზე. ჩვენ მოვუწოდებთ ყველას, რომ თავიდან იქნას აცილებული ისეთი ქმედებები, რაც გამოიწვევს ეჭვს, რომ არის პოლიტიკური რევანში და რაიმე ხორციელდება შერჩევითი სამართლის გამო".
თანათავმჯდომარეებმა იმედი გამოთქვეს, რომ ივნისში ასოცირების ხელშეკრულებას ხელი მოეწერება და შემდეგი შეხვედრა, რომელიც 2015 წელს უნდა ჩატარდეს, იქნება არა საქართველოსა და ევროპის პარლამენტის კომიტეტის თანამშრომლობის მე-17, არამედ საქართველოსა და ევროპის პარლამენტის ასოცირებული შეხვედრა.
