საქართველოს პრემიერ-მინისტრმა ჰააგის 2014 წლის ბირთვული უსაფრთხოების სამიტის მონაწილეებს ოკუპირებული რეგიონებიდან მომდინარე საფრთხეებზე ერთობლივი რეაგირებისკენ მოუწოდა.
როგორც ირაკლი ღარიბაშვილმა სამიტზე სიტყვით გამოსვლისას განაცხადა, ოკუპირებულ რეგიონებში, სადაც საერთაშორისო კონტროლის მექანიზმები სუსტია, კონტრაბანდის საშიშროება არსებობს, რაც მნიშვნელოვან გამოწვევად რჩება.
სწორედ ამიტომ, პრემიერი მიიჩნევს, რომ ბირთვული უსაფრთხოების უზრუნველყოფის მიმართულებით განხორციელებული ცვლილებების მიუხედავად, თვითკმაყოფილება გაუმართლებელია.
„ყველაზე მგრძნობიარე საკითხია ჩვენი ტერიტორიების დიდი ნაწილის, მათ შორის, სტრატეგიული მნიშვნელობის შავი ზღვისპირეთის ოკუპაციიდან გამომდინარე საფრთხე. ისევე, როგორც სხვა რეგიონებში, სადაც საერთაშორისო კონტროლის მექანიზმები ან საერთოდ არ არსებობს, ან ძალიან სუსტია, აქაც კონტრაბანდის საფრთხე საკმაოდ რეალურია. ეს საკითხი პრობლემატურია არა მხოლოდ ცალკეული ქვეყნებისთვის, არამედ საერთაშორისო თანამეგობრობისთვისაც ზოგადად. მოგიწოდებთ, შემომიერთდეთ, რათა სათანადო ყურადღება დავუთმოთ ამ საკითხს", - მიმართა ირაკლი ღარიბაშილმა ბირთვული უსაფრთხოების სამიტის მონაწილეებს.
ბირთვული უსაფრთხოების მესამე სამიტი ჰააგაში დღეს გაიხსნა. სამიტს ესწრებიან 53 სახელმწიფოს პირველი პირები და მთავრობის მეთაურები, ასევე ოთხი საერთაშორისო ორგანიზაციის ხელმძღვანელი. ბირთვული უსაფრთხოების სამიტს 5 ათასზე მეტი დელეგატი ჰყავს, მათ შორის აშშ-ის პრეზიდენტი ბარაკ ობამა, გერმანიის კანცლერი ანგელა მერკელი, დიდი ბრიტანეთის პრემიერ-მინისტრი დევიდ კემერონი, საფრანგეთის პრეზიდენტი ფრანსუა ოლანდი, ასევე ევროპის საბჭოს პრეზიდენტი ჰერმან ვან რომპუი და ევროკომისიის პრეზიდენტი მანუელ ბაროზო. ბირთვული უსაფრთხოების მესამე სამიტს პრემიერ-მინისტრ ირაკლი ღარიბაშვილის ხელმძღვანელობით საქართველოს 6-კაციანი დელეგაცია ესწრება.