დელიკატური მომენტების გამო გამოძიების ფედერალური ბიუროს დასკვნის ნაწილი არ უნდა გასაჯაროებულიყო, - განაცხადა ყოფილმა მთავარმა პროკურორმა მურთაზ ზოდელავამ ტელეკომპანია "რუსთავი 2"-ის გადაცემა "პოზიციაში".
"ჩვენს პერიოდში იყო კონსენსუსი იმაზე, რომ არ უნდა გაგვესაჯაროებინა ეს ნაწილი სწორედ იმ დელიკატური მომენტების გამო, რომელიც ამ სისხლის სამართლის საქმეში იყო. საზოგადოებას შეიძლება ბევრი კითხვა ჰქონდეს. ჩვენი არჩევანი იყოს ის, რომ პირველ რიგში ჩვენ პატივი ვეცით საქართველოს სახელმწიფოს. თანამდებობის პირი იყო ეს ადამიანი და ჩვენ ეს დელიკატური მომენტები, რაც იქ იყო, მივიჩნიეთ, რომ იყო უფრო მნიშვნელოვანი, ვიდრე ის, რომ რაღაც ჭორებს გამოეწვია ზიანი მმართველი გუნდისთვის. მიმაჩნია, რომ ეს იყო სწორი. მე ამაზე არ უნდა ვილაპარაკო. ვიყავი პროკურორი, ვეკიდებოდი სრული პასუხისმგებლობით, ყოველ შემთხვევაში, წლინახევრის შემდეგ ჩემს სეიფში არაფერი მიპოვია", - განაცხადა ზოდელავამ.
მისვე თქმით, იმ საქმეზე, რომელზეც კონფიდენციალურობა ეკისრებოდა, როგორც პროკურორს, უნდა შეინარჩუნოს.
„თუ დღევანდელი პოლიტიკური გუნდი გადაწყვეტს, რომ ეს უნდა გახდეს საჯარო, გადაწყვიტონ. ეს მათ ხელეწიფებათ, ეს მათი არჩევანი იქნება. დელიკატური არ ნიშნავს იმას, რომ გამოძიება მას გვერდს აუვლის. დელიკატური ნაწილიც, არადელიკატურიც, ყველაფერი გამოძიებული იყო. ეს ყველაფერი ედო საფუძვლად დღესაც არსებულ ვერსიას. დღესაც არავის არაფერი უარუყვია, არანაირი მტკიცებულება არ მოუტანია. დღეს რაც ხდება, ეს არის ფარსი",- განაცხადა ზოდელავამ.
