ბათუმში 8 მლნ დოლარის ღირებულების პროექტი ხორციელდება. აჭარის მთავრობის თავმჯდომარემ არჩილ ხაბაძემ და ბათუმის მერის მოვალეობის შემსრულებელმა გიორგი ერმაკოვმა თამარის დასახლებაში მდებარე მშენებარე ობიექტი მოინახულეს, სადაც სავაჭო ცენტრი, საოფისე ფართები, რკინიგზისა და ავტოსადგური განთავსდება. რეგიონისა და ქალაქის პირველი პირები ობიექტის პროექტს დეტალურად გაეცნენ.
პროექტის ინვესტიციის მოცულობა - 8 მილიონი აშშ დოლარია. ბიზნეს ცენტრში 200 ადამიანი დასაქმდება. კომპლექსში პირველ სართულზე რკინიგზის სადგურს 1000 კვ/მ დაეთმობა, სადაც მოეწყობა რკინიგზის მომსახურების სერვის ცენტრი, ოფისებითა და სალაროებით. მგზავრთა მოსაცდელი დარბაზი 150 ადამიანისთვის. ავტო სადგურისათვის კომპლექსში გათვალისწინებულია 15 საოფისე ფართი სატრანსპორტო-სამგზავრო კომპანიებისათვის. მოეწყობა ავტოსადგომი 22 ავტობუსისთვის. დღე-ღამის განმავლობში კი 600 ავტობუსის გატარება იქნება შესაძლებელი.
ბიზნესცენტრს შპს.,,GEORGIA INN" 22706 მ2- ზე აშენებს, ოთხსართულიანი შენობა 4200 კვ/მ ფართზე განთავსდება. სხვადასხვა დანიშნულების კომერციულ ობიექტებს 4300 კვ/მ დაეთმობა.
„წლის ბოლომდე დასრულდება აღნიშნული პროექტი, ვფიქრობთ ზაფხულისთვის ნაწილი გაიხსნება და რკინიგზის სადგური იფუნქციონირებს. ვფიქრობთ, რომ ძალიან მნიშვნელოვანი პროექტია ბათუმელებისთვის და ქალაქის სტუმრებისთვის როგორც ტურისტული ქალაქისთვის, რადგან რკინიგზის საკითხი ყოველთვის მტკივნეული იყო ბათუმისთვის და ვიზიტორებისთვისაც. წელს შეგვეძლება ძალიან კომფორტულად და კარგად მოვემსახუროთ ჩამობრძანებულ სტუმრებს"-განაცხადა არჩილ ხაბაძემ.