"პროკრედიტ ბანკ საქართველოს" ახალი გენერალური დირექტორი ჰყავს. 2014 წლის მარტში, დოქტორი საშა ტერნესის ბანკიდან წასვლის შემდეგ, გენერალური დირექტორის პოზიცია ასმუს როტნემ დაიკავა. დოქტორი საშა ტერნესი 2012 წლიდან ბანკის გენერალური დირექტორი, 2007 წლიდან კი მენეჯმენტის საბრჭოს წევრი იყო.
"პროკრედიტ ჯგუფში" ასმუს როტნეს კარიერის დასაწყისი სწორედ პროკრედიტ ბანკ საქართველოს უკავშირდება. პროკრედიტ ბანკ საქართველოში მიღებული სამუშაო გამოცდილება შემდგომ პროკრედიტ ბანკ რუმინეთში იმავე პოზიციაზე, გენერალური დირექტორის მოადგილის პოზიციაზე მუშაობით განაგრძო, პროკრედიტ ბანკ სომხეთის გენერალურ დირექტორად დანიშვნამდე კი პროკრედიტ ბანკ მოლდოვის მენეჯმენტის საბჭოს თავმჯდომარე იყო.
ასმუს როტნემ 2000 წელს დანიის აარუსის უნივერსიტეტის დამთავრების შემდეგ ბაკალავრის დიპლომი მიიღო პოლიტიკურ მეცნიერებაში, 2002 წელს კი ჰარვარდის უნივერსიტეტის მაგისტრის ხარისხი მიენიჭა აღმოსავლეთმცოდნეობაში (რუსეთი, აღმოსავლეთ ევროპა და ცენტრალური აზია) .
"მოხარული ვარ, რომ ჩემი კარიერა პროკრედიტ ჯგუფში სწორედ საქართველოში დაიწყო. პროკრედიტ ბანკის საქმიანობა ქვეყნის სპეციფიკიდან გამომდინარე განსხვავებულია, თუმცა ძირითადი პრინციპები, ბიზნეს მოდელი პროკრედიტ ჯგუფში შემავალ ყველა ქვეყანაში მსგავსია. პროკრედიტ ბანკი საქართველოში ძალიან მცირე, მცირე და საშუალო ბიზნესის განვითარებაზე ორიენტირებული ერთ-ერთი მოწინავე ბანკია, ჩემს კოლეგებთან ერთად ჩვენ კვლავ განვაგრძობთ ქართულ საბანკო ბაზარზე პოზიციონირებას და მომხმარებლებისთვის მათ საჭიროებებზე მორგებული მრავალფეროვანი და დახვეწილი მომსახურების შეთავაზებას"- განმარტავს ასმუს როტნე.
