დიდ ბრიტანეთში საქართველოს უწყებათაშორისი დელეგაციის ვიზიტის ფარგლებში, გაიმართა საგარეო საქმეთა მინისტრის პირველი მოადგილის დავით ზალკალიანის და ევროპულ და ევრო-ატლანტიკურ სტრუქტურებში ინტეგრაციის საკითხებში სახელმწიფო მინისტრის პირველი მოადგილის დავით დონდუას შეხვედრა გაერთიანებული სამეფოს საგარეო და თანამეგობრობის სამინისტროს ევროპის და ცენტრალური აზიის დირექტორატის უფროსის მოვალეობის შემსრულებელ სან მაკლეოდთან. შეხვედრა ასევე შედგა უსაფრთხოების პოლიტიკის დეპარტამენტის უფროსის მოადგილესთან დეივ პროდგერსთან და სამხრეთ კავკასიის ჯგუფის ხელმძღვანელთან ნილ ფლოიდთან.
ქართული დელეგაციის წევრები ვიზიტის ფარგლებში ასევე შეხვდნენ დიდი ბრიტანეთის პარლამენტის თემთა პალატის წევრს, საქართველოს საკითხებზე ინტერპარტიული ჯგუფის ხელმძღვანელს მარკ რეკლეს და ასევე ლორდთა პალატის წარმომადგენლებს.
საგარეო საქმეთა სამინისტროს ინფორმაციით, მხარეებმა განიხილეს მიმდინარე წლის შემოდგომაზე დიდ ბრიტანეთში დაგეგმილი ნატო-ს სამიტისთვის მზადების პროცესი და აღნიშნულ სამიტზე საქართველოს მიერ ინტეგრაციულ პროცესში მიღწეული პროგრესის ასახვის შესაძლებლობები. აღინიშნა ბუქარესტის სამიტის გადაწყვეტილების იმპლემენტაციის დაწყების აუცილებლობა და ამ კონტექსტში საქართველოს მიერ გაწევრიანების სამოქმედო გეგმასთან მიერთების მნიშვნელობა. მხარეებმა ასევე ისაუბრეს თავდაცვის და უსაფრთხოების სფეროში ორ ქვეყანას შორის თანამშრომლობის განვითარების ასპექტებზე.
შეხვედრებისას აგრეთვე განიხილეს საქართველოს ევროკავშირთან ინტეგრაციის პროცესის მიმდინარეობა. განსაკუთრებული ყურადღება დაეთმო ევროკავშირთან ასოცირების შესახებ შეთანხმების, ღრმა და ყოვლისმომცველი თავისუფალი ვაჭრობის შესახებ შეთანხმების ჩათვლით, დროულად ხელმოწერის მნიშვნელობას.
მხარეებმა ასევე ისაუბრეს რეგიონალურ საკითხებზე და უკრაინაში განვითარებულ მოვლენებზე. ხაზი გაესვა, უკრაინის ყირიმის რეგიონში ჩატარებული ე.წ. „რეფერენდუმის" უკანონობას და მის შეუსაბამობას საერთაშორისო და უკრაინული სამართლის ნორმებთან. აღინიშნა ყირიმის ნახევარკუნძულზე სიტუაციის დეესკალაციისა და სამხედრო დაპირისპირების თავიდან აცილებისთვის, უკრაინის სუვერენიტეტის და ტერიტორიული მთლიანობის პატივისცემის აუცილებლობა.
ვიზიტის ფარგლებში, ასევე დაგეგმილია შეხვედრების გამართვა გაერთიანებული სამეფოს თავდაცვის სამინისტროში და პარლამენტის თავდაცვის კომიტეტში. ასევე იგეგმება, საგარეო საქმეთა მინისტრის პირველი მოადგილის დავით ზალკალიანის სიტყვით გამოსვლა დიდი ბრიტანეთის საერთაშორისო ურთიერთობების სამეფო ინტიტუტში Chatham House თემაზე "საქართველოს საგრეო პოლიტიკა ახალ რეალობაში".
