დღეს, 19 თებერვალს, რეცეპტის ინსტიტუტის დამკვიდრებასთან დაკავშირებით, ბათუმში, შოთა რუსთაველის სახელმწიფო უნივერსიტეტის სააქტო დარბაზში გაიმართა სსიპ სამედიცინო საქმიანობის სახელმწიფო რეგულირების სააგენტოს სამუშაო ჯგუფის შეხვედრა აჭარის სააფთიაქო ქსელის წარმომადგენლებთან და პირველადი ჯანდაცვის რგოლის ექიმებთან.
შეხვედრას ესწრებოდნენ უმაღლესი საბჭოს და აჭარის ჯანდაცვის სამინისტროს წარმომადგენლები.
• 2013 წლის 30 ივლისიდან აიკრძალა პირველი და მეორე ჯგუფისთვის მიკუთვნებული ფარმაცევტული პროდუქტის არასრულწლოვანთათვის მიყიდვა.
• საკანონმდებლო ორგანოში წარდგენილია ცვლილებების პაკეტი „ნარკოტიკული საშუალებების, ფსიქოტროპული ნივთიერებების, პრეკურსორებისა და ნარკოლოგიური დახმარების შესახებ" და „ნარკოტიკული დანაშაულის წინააღმდეგ ბრძოლის შესახებ" საქართველოს კანონებში შესატანად. ცვლილებების თანახმად, კოდეინის, ეფედრინის, ფსევდოეფედრინისა და ნორეფედრინის შემცველ ფარმაცევტულ პროდუქტზე ვრცელდება სისხლის სამართლებრივი პასუხისმგებლობა. I ჯგუფის მიკუთვნებულ ცალკეულ ნოვთიერებებზე, რომლებიც არ ექვემდებარებიან საერთაშორისო კონტროლს და მათი გამოყენება ხდება არამიზნობრივად, შესაძლებელია ქვეყნის შიდა კვოტის განსაზღვრა, ასევე, დამატებით სახდელად განსაზღვრულია პროფესიული პასუხისმგებლობის საკითხი.
• საქართველოს შრომის, ჯანმრთელობისა და სოციალური დაცვის მინისტრის 2004 წლის 22 იანვრის №22/ნ ბრძანებაში განხორციელდა ცვლილება, რომლის თანახმად, II ჯგუფიდან I ჯგუფში გადატანილია ბაკლოფენი, გაბაპენტინი, დექსტრომეტორფანის შემცველი კომბინირებული პრეპარატები (გარდა სიროფებისა), ზოპიკლონი, ზალეპლონი და ტროპიკამიდი. მათ მიმოქცევაზე გავრცელდება იგივე კონტროლის მექანიზმები, რაც განსაზღვრულია ფსიქოტროპულ ნივთიერებებზე.
• მომზადებულია საქართველოს შრომის, ჯანმრთელობისა და სოციალური დაცვის მინისტრის №01-9/ნ ბრძანებაში ცვლილების პროექტი ფორმა N3 რეცეპტის ფორმასთან დაკავშირებით, ასევე სარეკომენდაციო დოკუმენტი სამედიცინო და ფარმაცევტული დაწესებულებებისთვის II ჯგუფის ფარმაცევტული პროდუქტის აფთიაქიდან ფორმა N3 რეცეპტით გაცემის ეტაპების შესახებ.