"ეს ფორუმი შესაძლებლობას გვაძლევს ვიმსჯელოთ საქართველოს ეკონომიკურ სტრატეგიასა და ძირითად მიმართულებებზე მსოფლიო ბანკის ექსპერტებთან ერთად, რომელთა უშუალო მონაწილეობითა და დახმარებითაც შემუშავდა ეს დოკუმენტები. ნება მომეცით, დიდი მადლობა გადავუხადო მათ მხარდაჭერისა და მჭიდრო თანამშრომლობისათვის"- განაცხადა საქართველოს პრემიერ-მინისტრმა ირაკლი ღარიბაშვილმა საქართველოს მთავრობისა და მსოფლიო ბანკის ჯგუფის ორგანიზებით გამართულ მაღალი დონის პოლიტიკური ფორუმს გახსნაზე, რომელიც „ქორთიარდ მარიოტში" იმართება.
ღარიბაშვილის განმარტებით, მთავრობამ არაერთხელ განაცხადა, რომ მთავრობის უმთავრესი პრიორიტეტი ეკონომიკური აღმავლობის მიღწევაა.
„წინა ხელისუფლებას გამოცხადებული ჰქონდა ლიბერალური ეკონომიკური პოლიტიკა, თუმცა, სინამდვილეში ეს ასე არ იყო. ხელისუფლება უხეშად ერეოდა ბიზნესის საქმიანობაში, რამაც თავისი უარყოფითი შედეგები გამოიღო. მათ თავი მოსწონდათ იმ ციფრებით, რომლებიც ეკონომიკური ზრდის მაჩვენებლების ზრდას გამოხატავდა, რეალურად კი სურათი სულ სხვაგვარი იყო - ეკონომიკური ზრდა არ აისახებოდა საქართველოს მოსახლეობის სოციალურ და ეკონომიკურ მდგომარეობაზე. სწორედ ამიტომ, ჩვენი ხელისუფლების მთავარი გამოწვევა დღეს ეს არის - ქვეყნის ეკონომიკური განვითარება და წინსვლა რეალურად შეეხოს თითოეულ ადამიანს, თითოეულ ოჯახს.
ჩვენი ხელისუფლების ამოცანაა საქართველოში შექმნას ბიზნესის წარმოების ისეთი გარემო, როდესაც ყველა მეწარმე ბიზნესის წარმოების ერთნაირ წესებს დაემორჩილება. წინა წლებში განხორციელებული რეფორმების შედეგად გაუქმდა ზოგიერთი რეგულაცია ან მარეგულირებელი ინსტიტუტი, რომელიც წარმოუდგენელია არსებობდეს ევროპულ ღირებულებებზე დაფუძნებულ ქვეყანაში, რისი ამბიციაც საქართველოს აქვს"- აღნიშნა ღარიბაშვილმა.
პრემიერ-მინისტრის განმარტებით, საქართველოს მთავრობის სტრატეგიული პრიორიტეტია ინკლუზიური ზრდის მიღწევა. ამისათვის კი საჭიროა მრავალი რეფორმის განხორციელება და აქტიური ეკონომიკური პოლიტიკის გატარება.
„ამ გზაზე მნიშვნელოვანია ვისარგებლოთ საერთაშორისო გამოცდილებით, რათა გავიზიაროთ სხვა ქვეყნების წარმატებული რეფორმები და ჩვენი პოლიტიკა უფრო ეფექტიანი გავხადოთ. ამიტომ, კიდევ ერთხელ მადლობა მინდა გითხრათ იმისათვის, რომ თქვენ მზად ხართ საქართველოს ეკონომიკური პოლიტიკის საკითხებზე დიალოგისათვის და დღევანდელი შეხვედრაც ამის დასტურია.
კარგი იქნება, თუ გავაგრძელებთ დიალოგს სხვადასხვა ფორმატში, მათ შორის ცალკეულ სამინისტროებთან, მათ შორის კონკრეტულ რეფორმებზე.
როგორც იცით, შემუშავებულია საქართველოს სოციალურ-ეკონომიკური განვითარების სტრატეგია, რომელიც არის კონცეპტუალური დოკუმენტი. ახლა ეკონომიკური ბლოკის სამინისტროებში მიმდინარეობს რეფორმების სამოქმედო გეგმების შემუშავება. ჩვენ შევქმენით მეწარმეობის განვითარების სააგენტო, რომელიც ხელს შეუწყობს მცირე ბიზნესის განვითარებას, დაგეგმილია ღონისძიებები ქვეყნის კონკურენტუნარიანობის ზრდის ხელშესაწყობად, მიმდინარეობს მსჯელობა საპენსიო რეფორმის გატარებაზე და სხვა.
ნებისმიერი პოლიტიკის განხორციელება მხოლოდ მაკროეკონომიკური სტაბილურობის პირობებში იქნება ეფექტიანი. შესაბამისად, ჩვენ დიდ მნიშვნელობას ვანიჭებთ ჯანსაღი ფისკალური პოლიტიკის გატარებას. ბუნებრივია, საჭიროებები და სურვილები ყოველთვის აღემატება შესაძლებლობებს, ამიტომ ჩვენ მიერ დახარჯული ყოველი თეთრი და განსახორციელებელი ყოველი რეფორმა კარგად აწონილ-დაწონილი უნდა იყოს, რათა მან მაქსიმალური ეფექტი მოგვცეს.
საქართველოს მთავრობა ხელს შეუწყობს ადგილობრივი ბიზნესის განვითარებას. ადგილობრივმა ბიზნესმა უნდა დაასაქმოს ადამიანები. სოციალური დახმარება უნდა გახდეს კიდევ უფრო მეტად მისამართული. იმისათვის, რომ ეკონომიკური ზრდის ეფექტი იგრძნოს მოსახლეობამ, მხოლოდ სოციალური დახმარების პროგრამები არ არის საკმარისი. უნდა შეიქმნას სამუშაო ადგილები, რათა ადამიანების კეთილდღეობა გაიზარდოს მათივე შრომის ანაზღაურებით და ქვეყანაში დოვლათის შექმნით. შრომის ბაზარზე პრობლემას წარმოადგენს მოთხოვნასა და მიწოდებას შორის არსებული დისბალანსი. ადამიანებს განათლება აქვთ ისეთ სფეროებში, რომლებზეც შრომის ბაზარზე მოთხოვნა ნაკლებია. ამავე დროს, არასაკმარისია სათანადო პროფესიული განათლების მქონე სამუშაო ძალა იმ ადგილების შესავსებად, რომლებსაც პროფესიული კვალიფიკაცია სჭირდება. მინდა გითხრათ, რომ ჩვენ აქტიურად ვმუშაობთ ამ მიმართულებით.
მიგვაჩნია, რომ საქართველოს გეოგრაფიული მდებარეობა არ უნდა იქნეს გამოყენებული მხოლოდ ტრანზიტისათვის. საქართველო უნდა გახდეს რეგიონალური ლოგისტიკური ჰაბი. ამისათვის საჭიროა განვითარებული ინფრასტრუქტურა, ჯანსაღი ენერგეტიკული სექტორი, სერვისების მაღალი დონე, რეგიონალური მასშტაბით კონკურენტუნარიანი კადრები. უნდა გაიზარდოს ქართული პროდუქციის წილი როგორც შიდა ბაზარზე, ისე ევროპულ ბაზარზე და ქართული პროდუქცია უფრო პოპულარული უნდა გახდეს.
საქართველო უნდა იქცეს რეგიონალურ სატრანზიტო და ლოგისტიკურ ცენტრად, რაც გულისხმობს ექსპორტზე დაფუძნებულ ეკონომიკურ ზრდას და უმუშევრობის შემცირებას. ამ ტრანსფორმაციის საფუძველი უნდა გახდეს ღია ეკონომიკა განვითარებული ინფრასტრუქტურით, მაღალი დონის ადმინისტრაციითა და ვაჭრობის ხელშემწყობი ლოგისტიკური სერვისებით.
როგორც იცით, ყოველი ეკონომიკური აქტივობის დაგეგმვასა და განხორციელებას გარკვეული დრო სჭირდება. მაგალითად, ამ ეტაპზე, ვფიქრობთ ექსპორტის განვითარებას ახალი ბაზრების წვდომის კუთხით. ფაქტია, რომ საქართველოს მიერ ბოლო წლებში ნაჩვენები ეკონომიკური ზრდა არ ხდებოდა კონკურენტუნარიანობის ზრდასთან ერთად. სრულიად ცხადია, რომ საჭიროა კონკურენტიანობის ამაღლება და ახალ ბაზრებზე შესვლისას ექსპორტის დივერსიფიკაცია. ასევე, ხომ არ ვიფიქროთ იმპორტის ჩანაცვლებაზე ადგილობრივი პროდუქციის სუბსიდირების გზით. ამისთვის კი საჭირო იქნება ინფრასტრუქტურის განვითარება და სატრანზიტო პოტენციალის მაქსიმალური გამოყენება.
ინფრასტრუქტურის განვითარების თვალსაზრისით, კვლავ პრობლემად რჩება სასოფლო-სამეურნეო ინფრასტრუქტურის განვითარების დონე. ამას გადამწყვეტი მნიშვნელობა აქვს სოფლის მეურნეობის სექტორის პროდუქტიულობისა და კონკურენტუნარიანობის ზრდისთვის. საჭიროა როგორც სასოფლო-სამეურნეო პროდუქციის პირველადი წარმოების, ისე მასთან დაკავშირებული გადამმუშავებელი მრეწველობის განვითარება. სამწუხაროდ, დღეს არასათანადოდაა განვითარებული საირიგაციო და სადრენაჟო ინფრასტრუქტურა.
თანამიმდევრულად უნდა განვითარდეს ექსპორტი ახალი ბაზრების წვდომის თვალსაზრისით. კერძოდ, ტექნიკური ბარიერები ვაჭრობაში არ იძლევა არსებული პრეფერენციული რეჟიმების ეფექტიანად გამოყენების საშუალებას. იმის გამო, რომ არ არსებობს დამხმარე ინფრასტრუქტურა, პოტენციურ საექსპორტო ბაზრებზე არა აქვთ საკმარისი ინფორმაცია და არ იცნობენ ქართულ საქონელს. იმისათვის, რომ ქართულმა პროდუქციამ შეაღწიოს ზოგიერთ ბაზარზე, საჭიროა არსებობდეს უკეთესი სავაჭრო რეჟიმები. ისიც ფაქტია, რომ არასათანადო სავაჭრო-ლოგისტიკური ინფრასტრუქტურა ზრდის ექსპორტირების ხარჯებს.
სამწუხაროდ, ექსპორტი არადივერსიფიცირებულია, დაბალია მისი დამატებული ღირებულება, სუსტია ახალ ბაზრებზე შეღწევისა და დამკვიდრების მაჩვენებლები. ეს ნათლად აჩვენებს, რომ ძალიან სუსტია ქვეყნის ეკონომიკის საერთაშორისო კონკურენტუნარიანობა, მათ შორის კერძო სექტორისაც, რომელიც ეკონომიკის ძირითადი მამოძრავებელი კომპონენტია. ყოველივე ამის შედეგია ის, რომ ქვეყანაში ძალიან დაბალია დასაქმების ზრდის ტემპი"- აღნიშნა ღარიბაშვილმა სიტყვით გამოსვლისას.
მისივე თქმით, მთავრობის მიზანს ინკლუზიური ეკონომიკური განვითარების მიღწევაა.
„ამ საქმეში დიდ მნიშვნელობა აქვს ქვეყნის რეგიონალურ განვითარებას. საჭიროა გადაიდგას თანამიმდევრული ნაბიჯები დეცენტრალიზაციის მიმართულებით და გაიზარდოს რეგიონალური ერთეულების როლი ადგილობრივი ეკონომიკური პროცესების სტიმულირებაში. ეს იქნება საერთო ეროვნული წარმატების მნიშვნელოვანი ფაქტორი.
ჩვენი მთავრობა, მისი ეკონომიკური გუნდი მზად არის ყველა საჭირო ნაბიჯი გადადგას იმისათვის, რომ მნიშვნელოვანი გარღვევა მოხდეს ჩვენი ქვეყნის ეკონომიკური განვითარების კუთხით. ჩვენ მზად ვართ მოვისმინოთ პატივცემული ექსპერტების რეკომენდაციები და მოსაზრებები, რომლებსაც გავითვალისწინებთ ეკონომიკური პოლიტიკის განხორციელებისას"- აღნინა ღარიბაშვილმა.