ციფრულ მიწისზედა სატელევიზიო მაუწყებლობაზე დადგენილ ვადებში გადასვლის უზრუნველსაყოფად, აუცილებელია დაჩქარებულ რეჟიმში ერთი სახელმწიფო მულტიფლექსი აიგოს, რომელზეც ფუნქციონირებას განახორციელებს საქართველოს საზოგადოებრივი მაუწყებელი, ხოლო პარალელური მაუწყებლობის დროს ასევე ეროვნული საეთერო მაუწყებლები.
„ელექტრონული კომუნიკაციების შესახებ" კანონში შესატანი ცვლილებებით ირკვევა, რომ გრძელვადიანი განვითარებისათვის საჭიროა ციფრული მიწისზედა სატელევიზიო ქსელის უზრუნველსაყოფად, რადიოსიხშირული სპექტრით სარგებლობის ლიცენზიების გაცემა მოხდეს კონკურსის წესით, საქართველოში არსებული თავისუფალი რესურსის გამოყენებით. კანონპროექტით გათვალისწინებულია ასევე, რომ რადიოსიხშირული სპექტრით სარგებლობის უფლება მოიპოვება ლიცენზიის საფუძველზე, აუქციონის ან კონკურსის წესით..
კანონპროექტით ასევე განისაზღვრება, რომ „რადიოსიხშირული სპექტრით სარგებლობის ლიცენზიას კომისია გასცემს აუქციონის ან კონკურსის წესით, ამ კანონის, „ლიცენზიებისა და ნებართვების შესახებ" საქართველოს კანონის, „სალიცენზიო და სანებართვო მოსაკრებლების შესახებ" საქართველოს კანონისა და კომისიის დადგენილებით დამტკიცებული რადიოსიხშირული სპექტრით სარგებლობის უფლების მოსაპოვებლად აუქციონის გამართვის დებულების შესაბამისად.".
შეგახსენებთ, რომ 2006 წელს „ჟენევა-06" გეგმით ITU (International Telecommunication Union)-მ, მსოფლიოს მრავალი ქვეყნისათვის, მათ შორის, საქართველოსთვის, განსაზღვრა ანალოგურიდან ციფრულ მიწისზედა სატელევიზიო (Digital Terrestrial Television, DTT) მაუწყებლობაზე გადასვლის ვადა 2015 წლის 17 ივნისამდე.
ციფრულ მიწისზედა მაუწყებლობაზე მიგრაცია, თავის მხრივ, რთულ პროცესს წარმოადგენს. კერძოდ, ვინაიდან ყოველი ქვეყანა ვალდებულია (როგორც საკუთარი, ასევე მეზობელი ქვეყნების), ანალოგური სამაუწყებლო სიგნალი დაიცვას ხელშეშლებისაგან 2015 წლის 17 ივნისამდე და ამავდროულად, უზრუნველყოს ციფრულ მაუწყებლობაზე მიგრაცია, (რაც თავის მხრივ, გულისხმობს გარდამავალ ეტაპზე, ე.წ. "Simulcast"-ის პერიოდში, ანალოგური და ციფრული სამაუწყებლო სიგნალების პარალელურ რეჟიმში გავრცელებას), საჭიროა, არსებული სიხშირული რესურსის ფარგლებში სამაუწყებლო არხები განაწილდეს ისეთი პრინციპით, რომ გარდამავალ ეტაპზე არ მოხდეს ციფრულ და ანალოგურ სამაუწყებლო სიგნალებს შორის ხელშეშლა, როგორც ერთი ქვეყნის მასშტაბით, ასევე მეზობელ ქვეყნებს შორის.
საქართველოს საკანონმდებლო სივრცესთვის სრულიად უცხოა ციფრული მიწისზედა სატელევიზიო მაუწყებლობის განხორციელების უზრუნველყოფისთვის საჭირო მარეგულირებელი ნორმები.
როგორც ეკონომიკისა და მდგრადი განვითარების სამინისტროში განმარტავენ, რამდენიმე თვის აქტიური მუშაობის შემდეგ სამინისტრომ შეიმუშავა დოკუმენტი, რომელიც განსაზღვრავს ციფრულ მაუწყებლობაზე გადასვლის ძირითად მიმართულებებსა და სამოქმედო გეგმას.
ციფრულ მაუწყებლობაზე გადასვლას როგორც ქვეყნისთვის, ასევე მაუწყებლებისა და მოსახლეობისთვის არაერთი დადებითი მხარე აქვს: პირველ რიგში, ციფრულ მაუწყებლობაზე გადასვლა ხელს შეუწყობს მედიაპლურალიზმს, სიტყვის თავისუფლებასა და ტელემაუწყებლობის შემდგომ განვითარებას. მაგალითად, დღეს არსებული ერთი სატელევიზიო სიხშირით მომავალში 15-მდე ციფრული სატელევიზიო არხი გავრცელდება. ეს თავის მხრივ საშუალებას მისცემს როგორც არსებულ, ასევე ახალ ტელემაუწყებლებს, გავრცელდნენ ღია ეთერით მთელი საქართველოს მასშტაბით და საქართველოს ყველა მოქალაქეს მიაწოდონ მაუწყებლობა. მოსახლეობას კი შესაძლებლობა ექნება, უფასოდ მიიღოს უფრო მეტი და გაუმჯობესებული ხარისხის სატელევიზიო არხი.
ციფრულ მაუწყებლობაზე გადასვლის შემდეგ მხოლოდ იმ ოჯახებისთვის, რომლებიც მაუწყებლობას იღებენ ღია ეთერით, ე. წ „სახლის ანტენებით" ციფრული მაუწყებლობის მისაღებად აუცილებელი იქნება კონკრეტული სტანდარტის ტელევიზორები ან ე.წ. სეთ-თოფ ბოქსები, რომლებიც 2014 წლიდან უფრო მასობრივად შემოვა საქართველოში და რომელსაც ექნება განმასხვავებელი ჰოლოგრამული ნიშანი-სტიკერი, რაც მომხმარებელს გაუადვილებს მათ ამოცნობას. ამასთან, რეფორმის ფარგლებში სახელმწიფომ გაითვალისწინა სოციალურად დაუცველი ოჯახების „სეთ-თოფ-ბოქსებით" უზრუნველყოფის საკითხიც.
