ეკონომიკისა და მდგრადი განვითარების მინისტრის პირველი მოადგილის დიმიტრი ქუმსიშვილის განმარტებით, IATA-ს აუდიტორები საქართველოში ჩამოვლენ და აეროპორტთან მიმართებაში საკუთარ აუდიტორულ დასკვნას დადებენ.
„ერთ თვეში საქართველოში IATA-ს აუდიტი ჩამოვა, მათ აუდიტისთვის 15 კვირა დასჭირდებათ, მაგრამ 15 კვირის შემდგომ გვექნება სრული სურათი, თუ რამდენად კარგად უვლიდნენ, ან უვლიან აეროპორტს. რამდენად სწორად არის დაგეგმარებული, რა პერსპექტივები აქვს ჩვენს აეროპორტს, რა პერსპექტივები აქვს ჩვენს აეროპორტს და სხვა. ასეთი კომპლექსური შესწავლა აეროპორტის არასოდეს არ განხორციელებულა და შესაბამისი დასკვნაც არასოდეს არ გვქონია"- აცხადებს ქუმსიშვილი.
შეგახსენებთ, რომ ცოტახნის უკან ეკონომიკისა და მდგრადი განვითარების მინისტრმა გიორგი კვირიკაშვილმა გააკეთა განცხადება, რომ "TAV Georgia" -თან გაფორმებული საჯარო კერძო პარტნიორობის ხელშეკრულება სახელმწიფოს მასში ახალი კორექტივების შეტანის უფლებას აძლევს.
„თურქულ კომპანიასთან მოლაპარაკებები საკმაოდ რთულ ფაზაში შევიდა. პრინციპში, ამ კომპანიასთან გვაქვს საჯარო კერძო პარტნიორობის მოდელი, ანუ ააშენე ოპერირება გაუწიე და გადაეცი უკან სახელმწიფოს. ამ მოდელის მიხედვით, კომპანიას ევალებოდა აეშენებინა და გაეწია მაღალი ხარისხის ოპერირება და შემდგომ გადაეცა სახელმწიფოსთვის. ჩვენ სპეციალურად მოვაწყვეთ სემინარი მსოფლიო ბანკისა და საერთაშორისო საფინანსო კორპორაციის მონაწილეობით, მოვიწვიეთ მსოფლიოში საუკეთესო სპეციალისტები და გვაინტერესებდა, ამ ტიპის მოდელების მუშაობის დადებითი და უარყოფითი მხარეები. პრინციპში ყველა ექსპერტმა ვინც იყო მოწვეული, აღნიშნა, რომ ეს არის საერთაშორისო პრაქტიკა და საჯარო კერძო პარტნიორობის ხელშეკრულების მუდმივი განახლება ხდება. ანუ აქ საუბარი არ არის იმაზე, რომ არ ვაღიარებთ დადებულ ხელშეკრულებებს. ეს არის საჯარო პარტნიორობის მოდელი და სახელმწიფოს მუდმივად უჩნდება მოთხოვნები მმართველი კომპანიის მიმართ. ჩვენ წავუყენეთ მათ საერთაშორისო პრაქტიკით გათვალისწინებული მოთხოვნები, დავიქირავეთ სპეციალური კომპანია, რომელმაც ტექნიკური დახმარება გავიწია ამ საკითხში და ამ მოთხოვნაზე დათანხმება კომპანიის მხრიდან ძალიან გახანგრძლივდა. იმიტომ, რომ ის ხელშეკრულება, რომელიც ჰქონდათ მათ, ასიმეტრიულ მოქნილობას აძლევდა. პირდაპირ, რომ ვთქვა, ეს იყო მათი მხრიდან არარეგლამენტირებული საქმიანობა", - განაცხადა გიორგი კვირიკაშვილმა და დასძინა, რომ მთავრობის სურვილია, TAV-ი საქართველოში დარჩეს და ოპერირება გააგრძელოს, ოღონდ განახლებული პირობებით.

შეგახსენებთ, რომ "TAV Georgia" „TAV Airports Holding"-ის შვილობილი კომპანიაა და მისი მოღვაწეობა საქართველოში 2005 წლიდან დაიწყო. საქრთველოში განხორციელებული 100 მილიონზე მეტი აშშ დოლარის ინვესტიციის შედეგად 2007 წელს ექსპლუატაციაში შევიდა თბილისისა და ბათუმის საერთაშორისო აეროპორტების ახალი სამგზავრო ტერმინალები. „ტავის" მიერ მსოფლიოს სხვადასხვა ქვეყანაში განხორციელებული მრავალმილიონიანი ინვესტიციის, აეროპორტების ორერირებაში მრავალწლიანი გამოცდილებისა და გონივრული მენეჯმენტის წყალობით ის ერთ-ერთი სანდო, სტაბილურ და დინამიურ კომპანიად ჩამოყალიბდა საქართველოში.
„TAV Airports Holding" ასევე ოპერირებას უწევს სტამბოლის, ანკარის, იზმირის, ალანიის საერთაშორისო აეროპორტებს თურქეთში, მაკედონიაში არსებულ 2 აეროპორტსა და 2 აეროპორტს ტუნისში. 2012 წლიდან ჰოლდინგმა დაიწყო საუდის არაბეთის მედინას აეროპორტის ოპერირებაც. „TAV Airports Holding" ოპერირებას უწევს კომერციულ ობიექტებს ლატვიაში, რიგის საერთაშორისო აეროპორტში.