ბრალდებულებთან გასაუბრებისა და მათი საცხოვრებელი საკნების დათვალიერების დროს გაირკვა, რომ საკნების კედლები, რომლებშიც ისინი იმყოფებიან არის ახლად შეღებილი, რის გამოც ნესტიანია და დაცული არ არის სანიტარულ-ჰიგიენური პირობები. საკნების ფანჯრები ვერ უზრუნველყოფს ბუნებრივ განათებას და ჰაერის ვენტილაციას, ვინაიდან მასთში ჩამონტაჟებულია გისოსების სამი რიგი, ხოლო ხელოვნური ვენტილაციის სისტემა ჩართული არ არის. ნესტიანი კედლების პირობებში, ჩართული გათბობის სისტემის მიუხედავად, საკნებში არის დაბალი ტემპერატურა, ვინაიდან არასაკმარისი ვენტილაციის გამო ბრალდებულები თავს იკავებენ ფანჯრების დახურვისგან.

ბრალდებულებმა საუბრის დროს განაცხადეს, რომ ზემოაღნიშნული პირობებიდან გამომდინარე, აწუხებთ უჰაერობა, #6 დაწესებულებაში მოთავსების დღიდან (2013 წლის 28 ნოემბრიდან) არ არიან უზრუნველყოფილი გასეირნების უფლებით და საკნებში იმყოფებიან მარტო, სხვა პირებისგან იზოლირებულად. ყოველივე ზემოაღნიშნული უარყოფითად მოქმედებს მათ ფსიქიკურ მდგომარეობაზე, რაც გამოიხატება უძილობაში, შფოთვასა და ადვილად გაღიზიანებაში. ზოგიერთ მათგანს მიყენებული აქვს თვითდაზიანება, რის მიზეზადაც არასათანადო პირობებში მოთავსებას ასახელებენ.

ყოველივე ზემოაღნიშნულიდან გამომდინარე, საქართველოს სახალხო დამცველი რეკომენდაციით მიმართავს საქართველოს სასჯელაღსრულების, პრობაციისა და იურიდიული დახმარების საკითხთა მინისტრს, უზრუნველყოს ბრალდებულების ზ.კ-ის, ა.ი-ის, შ.ჭ-ის, ა.გ-ის, ნ.დ-ის და გ.ნ-ის ეროვნული და საერთაშორისო კანონმდებლობით დადგენილი სტანდარტების შესაბამის საცხოვრებელ პირობებში მოთავსება, ასევე მათ მიერ სუფთა ჰაერზე გასეირნების უფლებით შეუფერხებელი სარგებლობა და განიხილოს მათი საკანში მარტო ყოფნის მიზანშეწონილობის საკითხი, რათა ისინი არ დაექვემდებარონ არაადამიანურ და დამამცირებელ მოპყრობას", _ნათქვამია განაცხადებაში.