თბილისის ყოფილი მერი პრემიერ-მინისტრს ტყუილში ადანაშაულებს. როგორც გიგი უგულავას Facebook-ის გერდზე გამოქვეყნებულ განცხადებაშია აღნიშნული, ირაკლი ღარიბაშვილმა უბრალოდ იცრუა, როცა თქვა, რომ თითქოს არ ჩარეულა მოსამართლის "პარტიზანული ღამის გადაწყვეტილებაში".
„გული მწყდება, რომ ქვეყნის პრემიერ-მინისტრი არათუ არაკომპეტენტურობას ავლენს ქვეყნის ეკონომიკისა და ზოგადად ქვეყნის მართვის საკითხში, ის უბრალოდ მატყუარაც არის. რომ აღარაფერი ვთქვათ მისი მხრიდან ხუთ წუთში ერთხელ, ბიძინა ივანიშვილის, როგორც მაშველი რგოლის მოხსენიებაზე.
ჩემი უფლებამოსილების შეჩერებასთან დაკავშირებით, რაზეც ასევე შეშფოთება გამოთქვა ევროპის საბჭოს საპარლამენტო ასამბლეის თანამომხსენებელმა მაიკლ იენსენმა, პრემიერ-მინისტრმა უბრალოდ იცრუა, როცა თქვა, რომ თითქოს არ ჩარეულა მოსამართლის "პარტიზანული ღამის გადაწყვეტილებაში". სასამართლო პროცესამდე ჩემს მიერ, გაკეთებული განცხადება მოწმობს, რომ წინასწარ ცნობილი იყო, თუ რა შედეგი დადგებოდა. მე მივუთითე გვარებიც, თუმცა ცხადია, პროკურატურას არაფერი გამოუძიებია.
მეგობრებო, მე განმარტება აუცილებლად მივიჩნიე, რადგან პრემიერ-მინისტრი ურცხვად ტყუის, თუმცა ვაღიარებ, რომ იმ აბსურდის კასკადთან შედარებით, რაც შემდეგ მოჰყვა ზემოთაღნიშნულ საკითხს, ყოველივე ეს ნამდვილად მეორეხარისხოვანია"- აცხადებს უგულავა.
