საქართველოს პრეზიდენტმა გიორგი მარგველაშვილმა საქართველოში ვიზიტად მყოფი ევროპის სოციალ-დემოკრატთა ფაქტების დამდგენი მისია მიიღო. შეხვედრას ქართული დელეგაციის მხრიდან პრეზიდენტის ადმინისტრაციის უფროსი ლაშა აბაშიძე და პრეზიდენტის მრჩეველი საგარეო პოლიტიკის საკითხებში ვანო მაჭავარიანი დაესწრნენ.
საქართველოს პრეზიდენტმა ევროპის სოციალ-დემოკრატიული ფრთის ლიდერებს მადლობა გადაუხადა საქართველოში ვიზიტისთვის და იმ მხარდაჭერისთვის , რომელსაც სოციალ-დემოკრატთა პოლიტიკური ჯგუფის წარმომადგენლები საქართველოს ამჟამინდელი ხელისუფლების მიმართ აფიქსირებენ.
შეხვედრაზე მხარეებმა საქართველო-ევროკავშირის ურთიერთიბები და კონფლიქტის მშვიდობიანი გზით მოგვარების თემები განიხილეს. საუბარი ასევე შეეხო საქართველოს პრეზიდენტის როლს ქვეყნის შიდა პოლიტიკურ პროცესებში.
საქართველოს პრეზიდენტთან შეხვედრის მნიშვნელობაზე ევროპარლამენტის დეპუტატმა, ევრონესტის საპარლამენტო დელეგაციისა და ევროპარლამენტის სამხრეთ კავკასიასთან ურთიერთობის წევრმა ედით ჰერცოგმა ისაუბრა: „ძალიან მნიშვნელოვანი შეხვედრა იყო, საქართველოში ჩამოვედით რათა შევაფასოთ მომავალი საქმიანობის პოტენციალი. ჩვენ წარმოვადგენთ ევროპის პროგრესულ ძალებს და განსაკუთრებით ვილნიუსის სამიტის შემდეგ ვაფიქსირებთ, რომ ჩვენი სურვილია საქართველოს ევროინტეგრაცია მოხდეს სწრაფად და შეუფერხებლად ევროპის პროგრესულ ძალებთან თანამშრომლობით".
